Ирмос: Вcку́ю мя отри́нул еси́ от лица́ Твоего́, Све́те Незаходи́мый, / и покры́ла мя есть чужда́я тьма, окая́ннаго, /но обрати́ мя и к све́ту за́поведей Твои́х/ пути́ моя́ напра́ви, молю́ся.
Преподо́бнии отцы́ Афо́нстии, моли́те Бо́га о нас.
Преподо́бнии отцы́ Афо́нстии, вы, я́ко сла́вие сладкогла́снии, посреде́ де́брий Святы́я Горы́ живу́ще, спаси́тельным и́менем Иису́совым поуча́стеся при́сно, ум свой просвеща́юще Боже́ственным све́том, сердца́ же услажда́юще отту́ду источа́ющеюся ра́достию, е́же моли́твами свои́ми и нам подади́те, помина́ющим вас.
Преподо́бнии отцы́ Афо́нстии, моли́те Бо́га о нас.
Иоаса́фа преподо́бнаго Диони́сиевы оби́тели в пе́сни похваля́ю, я́ко, ра́дуяся, кровь свою́ излия́л есть за любо́вь всех Царя ́Христа́ и муче́ния вене́ц прия́л есть.
Преподо́бнии отцы́ Афо́нстии, моли́те Бо́га о нас.
Подоба́ет вои́стинну Ка́ллиста вели́каго в пе́снех похвали́ти, му́дрый и Богодухнове́нный орга́н благода́ти, И́верския же оби́тели украше́ние и па́стыря сла́внаго.
Пресвята́я Богоро́дице, спаси́ нас.
Богородичен: Ра́дуйся, Де́во, я́ко благослове́нием Твои́м осени́ Го́ру си́ла Вы́шняго; ра́дуйся, вертогра́д духо́вный благода́тию Бо́жиею в насле́дии Свое́м насади́вшая; ра́дуйся, я́ко удо́лия и де́бри его́ напо́лнишася и́ноки; ра́дуйся, я́ко просия́ во Афо́не мно́жество преподо́бных, моля́щихся о спасе́нии душ на́ших.
Ин канон
Преподо́бнии отцы́ Афо́нстии, моли́те Бо́га о нас.
Изря́дная о́трасль Зогра́фския оби́тели, почте́н да буд́ет в пе́снех Косма́ преподо́бный, и́же Богоро́дицу свои́ма очи́ма ви́де, и с ним да почте́н бу́дет священному́ченик Конста́нтий, и́же в Ла́вре поживе́.
Преподо́бнии отцы́ Афо́нстии, моли́те Бо́га о нас.
О Го́споде ра́дуйся и ты, оби́тель Кутлуму́сская, я́ко в преде́лех твои́х процвете́ Киприа́н вели́кий, Христо́в свяще́нник и преподобному́ченик.
Сла́ва Отцу́ и Сы́ну и Свято́му Ду́ху.
Я́коже ма́ти в ча́дех, Диони́сиева оби́тель весели́тся: честна́го Мака́рия, но́ваго му́ченика, и Лео́нтия, от гро́ба пресла́вно источи́вшаго ми́ро благоуха́нно, сла́вит.
И ны́не и при́сно и во ве́ки веко́в. Ами́нь.
Богородичен: Кто не ра́дуется, слы́ша обеща́ние Твое́, Пренепоро́чная Отрокови́це? Ты бо рекл́а еси́, я́ко зде до́бре живу́щия Сы́ну Твоему́ и Бо́гу предста́виши, проще́ние прегреше́ний им испроси́вши.