Ирмос: Очи́сти мя, Спа́се, / мно́га бо беззако́ния моя́, /и из глубины́ зол возведи́, молю́ся,/к Тебе́ бо возопи́х, и услы́ши мя,/ Бо́же спасе́ния моего́.
Преподо́бнии отцы́ Афо́нстии, моли́те Бо́га о нас.
Преподо́бнии отцы́ Афо́нстии, вы, многоразли́чныя по́двиги соверши́вше, си́ми от Горы́ сея́ возлете́сте в го́ры Небе́сныя и, жили́ще свое́ та́мо утверди́вше, ны́не упокоева́етеся душа́ми свои́ми, я́ко златы́я и вседо́брыя голуби́цы, иде́же помяни́те и нас, восхваля́ющих вы.
Преподо́бнии отцы́ Афо́нстии, моли́те Бо́га о нас.
Ла́вры свяще́нное воспита́ние пе́сньми почти́м, / безпло́тнаго во пло́ти, Богонебе́снаго Макси́ма,/ от Боже́ственнаго Ду́ха бога́тый дар проро́чества прие́мшаго.
Преподо́бнии отцы́ Афо́нстии, моли́те Бо́га о нас.
Ватопе́дския оби́тели почита́ю Боже́ственныя о́трасли, Неофи́та сла́внаго, глас услы́шавша Чи́стыя Богоотрокови́цы, и в преподо́бных просия́вшаго Никоди́ма.
Пресвята́я Богоро́дице, спаси́ нас.
Богородичен: Ра́дуйся, я́ко на насле́дие Твое́ при́сно призира́еши; ра́дуйся, я́ко благода́ти Бо́жия и ми́лости Свое́й сподобля́еши е; ра́дуйся, на ка́мени за́поведий Христо́вых сердца́ рабо́в Твои́х утвержда́ющая; ра́дуйся, благослове́ние Сы́на Твоего́ на нас низводя́щая.
Ин канон Преподо́бнии отцы́ Афо́нстии, моли́те Бо́га о нас.
Диони́сиевы оби́тели изря́дное удобре́ние, пет бу́ди по до́лгу, Ни́фонте чу́дный, Константи́ня гра́да бы́вый па́стырю и всем преподо́бным ве́рше.
Преподо́бнии отцы́ Афо́нстии, моли́те Бо́га о нас.
Весели́ся, честна́я оби́тель Дохиа́рская, обогати́вшися созида́телем сла́вным, му́дрым Неофи́том, обогаще́нным доброде́телию вся́кою, я́ко дре́во благопло́дное.
Сла́ва Отцу́ и Сы́ну и Свято́му Ду́ху.
По́стнице Каре́йская, весели́ся и ты о Боже́ственней Ду́се,/ процве́тши сла́внаго Некта́рия, во́ду сладча́йшую доброде́телей и преподо́бных купножи́теля.
И ны́не и при́сно и во ве́ки веко́в. Ами́нь.
Богородичен: Спобо́рством Твои́м, Богороди́тельнице, огради́вшеся, я́ко всеору́жием кре́пким, Горы́ сея́ преподо́бнии все победи́ша во́инство де́монское и по́честь побе́ды прия́ша.