Ирмо́с: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.
Святи́телю о́тче Григо́рие, моли́ Бо́га о нас.
Но́щь безлу́нную и тму́, Григо́рие, страсте́й моли́твенною па́лицею ра́нив, я́коже Моисе́й Еги́пта, восте́кл еси́ па́че естества́ к виде́нию Боже́ственному и законода́вец на́м бы́л еси́.
Святи́телю о́тче Григо́рие, моли́ Бо́га о нас.
На высоту́ возше́д Боже́ственную, о́тче Григо́рие, доброде́телей, я́коже на фаво́ре Христо́вы дру́зи и ученицы́, Оного узре́л еси́, есте́ственную и Боже́ственную сла́ву явля́юща, и, обожи́вся, друго́е показа́ся со́лнце.
Сла́ва Отц́у и Сы́ну и Свято́му Ду́ху.
Таи́нник Божества́, богови́дче Григо́рие, и неизрече́нных прича́стник ты́ бы́в, богосло́вити Того́ та́йну, Еди́но Тоя́ возвести́в и Несозда́но си́лою и Естество́м Тре́ми Соста́вы.
И ны́не и при́сно и во ве́ки веко́в. Ами́нь.
Сло́во Ро́ждшую, Бо́жие Неизрече́нное, словесы́ воспе́л еси́ свяще́нными и та́йну све́тло Боже́ственнаго воплоще́ния возвести́л еси́, Юже ны́не моли́ Це́рковь соблюда́ти необурева́ему.