Молитва на Успение Пресвятой Богородицы
О, Пресвятая Богородице, Дево, Владычице, Высшая Ангел и Архангел, и всея твари Честнейшая! Ангельское великое удивление; Пророческая высокая проповеди; Апостольская преславная похвала; Святителей — изрядное украшение; мучеников — крепкое утверждение; иноков — спасительное наставление; постников — неизнемогающее воздержание; девствующих — чистота и слава, Матерей — тихое веселие; младенцев — мудросте и наказание; вдовиц и сирых — кормительница; нагих — одеяние; болящих — здравие; пленников — избавление; по морю плавающих — тишина; обуреваемых — небурное пристанище; блуждающих — нетрудная наставнице; путешествующих — легкое прехождение; трудящихся — благое покоище; в бедах сущих — скорая заступнице; обидимых — покров и прибежище; ненадеющихся — надеяние; требующих — помощнице; нищих — неистощимое богатство; печальных — присное утешение; ненавидимых — любовное смирение; грешников — спасение и к Богу присвоение; правоверных всех — твердое ограждение, непобедимое поможение и заступление! Тобой нам Владычице, — Невидимый, — видим бысть, и Тебе мольбу приносим, Госпоже, грешнии раби Твои! О, Премилостивая и Пречудная Света Умного Царица, Рождшая Царя Христа Бога нашего, Живодавца всех! От небесных (сил) славимая и от земных хвалимая! Ангельский уме, Светозарная звездо; Святых Пресвятейшая; Царица Цариц; Владычице всех тварей; Благолепная Девице; Нескверная Невесто; Палата Духа Пресвятого; огненный престоле Невидимого Царя; Небесный кивот; Носило Слова Божия; огнеобразная колеснице; Покоище живаго Бога; неизреченное составление плоти Христовой; Гнездо Орла Небесного; Горлице Богогласная; Голубице кроткая, тихая и незлобивая; Мати чадолюбивая; милостей бездна, развергающая тучу гнева Божия; неизмеримая глубина; неизреченная тайна; несведомое чудо; Нерукотворенная церковь Единого Царя всех век; благоуханное кадило; честная багряница; Боготканная порфира; душевный раю; живоносного сада отрасль; цвете прекрасный; гроздие спасения нашего; чаше Царя Небесного, в Ней же растворися от Духа Святаго вино неисчерпаемый благости; ходатайнице закона; зачало истинные веры Христовы; непоколебимый столпе; еретиков пагуба; меч ярости Божия на богопротивных; бесов устрашение; во бранех побеждение; христиан всех неложная хранительнице, — и мира всего, известное спасение! О, Всемилостивая Госпоже, Дево, Богородице, — услыши нас, молящихся Тебе, и яви милость Твою на людех Твоих! Моли Сына Своего: избавитеся нам от всякого зла, и сохрани обитель нашу и всяку обитель, и град, и страну верных, и люди благочестно прибегающие и призывающие Имя Твое Святое, от всякие напасти, губительства, глада, труса, потопа, огня, меча, нашествия иноплеменников и междоусобныя брани; от всякия болезни и всякого обстояния: да ни ранами, ни прещением, ни мором, ни всяким праведным гневом Божиим — умалятся раби Твои, но соблюдай и спасай милостию Своею, Госпоже, за ны молящеся, и полезное благорастворение воздуха, ко времени плодного приношения, нам даруй. Облегчи, восстави и помилуй, Премилостивая Владычице, Богородице Препетая, во всякой беде и нужде сущия! Помяни рабы Твоя, и не презри слез и воздыхания нашего; и обнови нас благодатию Своея милости: да со благодарением утешаемся, обретши Тя помощницею! Умилосердися, Госпоже Пречистая, на немощные люди Твоя, Надежда наша! Рассеянные собери, заблудшие, — на путь правый настави; отпадшия от благочестивыя отеческая веры, — паки возврати; старость поддержи; юные накажи; младенцы воспитай; и прослави, славящия Тя, — изряднее же — Церковь Сына Твоего, — соблюди и сохрани в долготу дней! О, милостивая и премилостивая Царице небеси и земли, Богородице Приснодево! Ходатайством Твоим помилуй Благочестивейшаго, Самодержавнейшаго, Великаго Государя нашего, Императора Александра Николаевича и весь Царствующий Дом, палату и все воинство их, и вся Православные Христианы, сохраняюще их под кровом милости Твоея, ризой Твоею честной защити; и моли из Тебе Воплотившагося без семени Христа Бога нашего: да препояшет ны свыше силой, на вся видимые и невидимые враги наши; на иноплеменники, воюющее на нас и на веру нашу православную! Спаси же и помилуй, Госпоже, — Святейший, Правительствующий Синод и преосвященныя Митрополиты, Архиепископы и Епископы Православныя; иереи же и диаконы, и весь причет церковный, и вся правоверные люди, поклоняющиеся и молящиеся пред честной Твоею Иконой! Призри на всех нас призрением милостиваго Твоего заступления! Воздвигни нас из глубины греховныя и просвети очи сердечныя ко зрению спасения! Милостива нам буди зде, и на страшном Суде Сына Твоего о нас умоли; преставльшиеся во благочестии от жития сего рабы Твоя — в вечной жизни со Ангелы и Архангелы и со всеми святыми, — притчи: да одесную Сына Твоего и Бога предстанут! И молитвой Твоею сподоби вся православныя Христианы со Христом жити и радости Ангельские, в небесных селениях, наслаждатися! Ты бо еси, Госпожа, — слава небесных и упование земнородных; Ты наша надежда и заступница всех, к тебе притекающих и Твоея помощи просящих! Ты молебница наша теплая к Сыну Твоему и Богу нашему! Твоя Матерняя молитва много может на умоление Владыки, и Твоим предстательством ко престолу благодати, Пресвятых и Животворящих Его Таин — приступати дерзаем, аще и недостойнии! Тем же Всечестный Образ Твой, и рукой Твоею, держимаго Вседержителя, — видяще на иконе, — радуемся грешнии; со умилением припадающе и любовию сей (образ) целуем, чающе, Госпоже, Твоими святыми, благоприятными молитвами, дойти небесные, бесконечные жизни и непостыдно стати, в день судный, одесную Сына Твоего и Бога нашего, славяще Его, купно со Безначальным Отцем, и Пресвятым, Благим, Животворящим и Единосущным Сыном, во веки веков. Аминь.
Молитва на день Покрова Пресвятой Богородицы
О, Пресвятая Дево, Мати Господа вышних сил; небеси и земли Царице; града и земли нашея — Всемощная заступнице! Приими хвалебноблагодарственное пение сие от нас, недостойных рабов Твоих и вознеси молитвы наши к престолу Бога, Сына Твоего! Да милостив будет неправдам нашим и пробавит (продолжит) благодать Свою чтущим Всечестное имя Твое, и с верой и любовию поклоняющимся Чудотворному Образу Твоему! Несмы бо достойни от Него помилованы быти, аще не Ты умилостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомненней и скорой заступнице нашей! Услыши нас, молящихся Тебе: осени нас Вседержавным покровом Твоим и испроси у Бога, Сына Твоего: пастырем нашим ревность и бдение о душах; градоправителям мудрость и силу; судиям — правду и нелицеприятие; наставником — разум и смиренномудрие; супругам — любовь и согласие; чадам — послушание; обидимым — терпение; обижающим — страх Божий; скорбящим — благодушие; радующимся — воздержание; всем же нам: дух разума и благочестия, дух милосердия и кротости, дух чистоты и правды! Ей, Госпоже Пресвятая! Умилосердися на немощные люди Твоя: рассеянные — собери; заблудшие — на путь правый настави; старость — поддержи, юные — уцеломудри; младенцы — воспитай, и призри на всех нас призрением милостиваго Твоего заступления! Воздвигни нас из глубины греховные и просвети сердечныя очи наша ко зрению спасения; милостива нам буде зде, и тамо: — в стране земного пришествия и на страшном суде Сына Твоего! Представльшиеся же, в вере и покаянии, от жития сего отцы и братию нашу, — к вечней жизни, со Ангелы и со всеми Святыми, — сотвори! Ты бо еси, Госпоже, — слава небесных и упование земных! Ты, по Бозе, — наша надежда и заступница всех, притекающих к Тебе с верой! К Тебе убо молимся, и Тебе яко Всемогущей помощнице, — сами себе и друг друга, и весь живот наш — предаем, ныне, и присно, и во веки веков. Аминь.
Молитва святому Ангелу Хранителю