Владыко человеколюбче, Царю Небесный, Господи Иисусе Христе, Боже наш, нас ради человек и нашего ради спасения на землѝ с плотию яви́выйся и с человеки поживый! Молим Тя, Вседержителю Господи, долготерпеливе и многомилостиве, даждь нам всегда пред Тобою имети мысль благу и Тебе благоугодну, да от нощнаго и мрачнаго зла диавола свободившеся, со всяким усердием поработаем Тебе в преподобии и правде и истине, со страхом и трепетом во вся дни жизни нашея, и до последняго издыха́ния воспева́ти Тя будем, ко славословию же Твоему всегда бо́дренно и тре́звенно потщимся: вся бо Ти возможна суть, и без Твоея воли ничтоже есть: твориши бо вся, елика хощеши творити и елика Твое неизреченное благоволит благосердие. Како убо умолчит язык наш, илѝ ки́ими песньми во хвалении не воспеваем о Твоем к нам великом милосердии, яко таковы́я радости нас грешных и веселия духовнаго исполнил еси? Ка́ко же возмо́жем воспе́ти язы́ки нашими илѝ усты̀ восхвали́ти и возвели́чити неизреченную Твою к нам благость, е́юже показал еси нам такова̀ праздника днесь? О Владыко человеколюбче, Боже наш, Господи Иисусе Христе! Услыши нас недостойных, молящихся Тебе, и посли в помощь нам праведнаго сего Твоего угодника, благовернаго князя Андреа, яко да молитвами его свободимся от всяких напастей душевных и телесных: ибо мы, прибегающе ко гробу его, покланяемся и целуем с верою святый его образ: подава́ет бо молящымся многая чудеса и исцеления. О дивный в чудесех, прославляемый от Бога на небесех, святый благоверный княже Андрее! Молися о нас грешных ко Христу Богу, яко да помилует нас всех, приходящих ко гробу твоему, и молящихся тебе с верою, и покланяющихся образу святому твоему, и с любовию целующих его, и тя на помощь во всяких ско́рбех и напа́стех призывающих: буди теплый вспомогатель и в болезнех скорый целитель: даруй здравие неоскудно и помощь неосла́бну нам молящымся тебе: буди же помощник и заступник сирота́м безпо́мощным и вдови́цам, и всем подаждь вся ко спасению и пользе просимая: и святыми твоими молитвами защити, соблюди и сохрани Российския грады и страны от всех зол, болезней, напастей и навет вражиих и от нахождения иноплеменных и мождоусобныя брани: и предстоя у престола Владычня, молися о нас грешных ко Христу Богу нашему, Емуже подобает всякая слава, честь, поклонение и великолепие, купно со Отцем и со Святым Духом, ныне и присно и во веки веков.