О Пресвятая Богородице, Дево Владычице, вышшая Ангел и Архангел, и всея твари Честнейшая, ангельское великое удивление, пророческая высокая проповедь, апостольская преславная Похвало, святителей изрядное украшение, мучеников крепкое утверждение, иноков спасительное наставление, постников неизнемогающее воздержание, действующих Чистото и Славо, матере тихое веселие, младенцев мудросте и вразумление, вдовиц и сирых Кормительнице, нагих одеяние, болящих здравие, пленников избавление, по морю плавающих тишино, обуреваемых небурное пристанище, блуждающих нетрудная Наставнице, путешестующих легкое прехождение, труждающихся благое покоище, в бедах сущым скорая Заступнице, обидимых покрове и прибежище, ненадеющихся надеяние, требующих помощнице, нищих неистощимое богатство, печальных присное утешение, ненавидимых любовное смирение, грешников спасение и к Богу присвоение, прпвоверных всех твердое ограждение, непобедимое поможение и заступление! Тобою нам, Владычице, невидимый видимь бысть, и Тебе мольбу приносим, Госпоже, грешнии раби Твои: о Премилостивая и Пречудная света умнаго Царице, рождшая Царя Христа Бога нашего, Живодавца всех, от небесных славимая и от земных хвалимая: ангельский уме, светозарная звездо, святых Пресвятейшая, Царице цариц, Владычице всех боголепная Девице, нескверная Невесто, Палато Духа Пресвятаго, огненный Престоле невидимаго Царя, небесный Кивоте, Носило Слова Божия, огнеобразная Колеснице, Покоище Живаго Бога, неизреченное составление плоти Христовы: гнездо орла небеснаго, горлице богогласная , голубице кроткая, тихая и незлобивая, Мати чадолюбивая, милостей бездно, развергающая ту́чу гнева Божия, неизмеримая глубино, наизреченная тайно, неведомое чудо, нерукотворенная церковь Единаго Царя всех век, благоуханное кадило, честная багрянице, боготканная порфиро, душевный раю, живоноснаго сада отрасле, цвете прекрасный, процветный нам небесное веселие, грозде спасения нашего, чаше Царя Небесного, в нейже растворися от Духа Святаго вино неисчерпаемыя благодати, Ходатаице закона, зачало истинныя веры Христовы, непоколебимый столпе, еретиков пагубо, мечу ярости Божия на богопротивных, бесов устрашение, во бранех побеждение, христиан всех неложная Хранительнице и мiра всего известное спасение! О Всемилостивая Госпоже, Дево Владычице Богородице, услыши нас молящихся Тебе, и яви милость Твою на людех Твоих: моли Сына Твоего избавитися нам от всякаго зла, и сохрани обитель, и град и страну верных, и люди благочестно прибегающыя и призывающыя имя Твое святое, от всякия напасти, губительства, глада, труса, потопа, огня, меча, нашествия иноплеменников и междоусобныя брани, от всякия болезни и всякаго обстояния: да ни ранами, ни прещением, ни мором, ни всяким праведным гневом Божиим ума́лятся раби Твои: но соблюдай и спасай милостию Твоею, Госпоже, за ны молящися, и полезное воздуха благорастворение ко времени плоднаго приношения нам даруй: облегчи, возстави и помилуй, Премилостивая Владычице, Богородице Препетая, во всякой беде и нужде сущыя. Помяни рабы Твоя, и не презри слез и воздыхания нашего, и обнови нас благостию Твоея милости, да со благодарением утешаемся, обре́тши Тя Помощницу. Умилосе́рдися, Госпоже Пречистая, на немощныя люди Твоя, Надеждо наша: разсеянныя собери, заблуждшыя на путь правый настави, отпадшыя от благочестивыя отеческия веры паки возврати, старость поддержи, юныя вразуми, младенцы воспитай, и послави славящыя Тя: изряднее же Церковь Сына Твоего соблюди и сохрани в долготу дний. О Милостивая и Премилостивая Царице небесе и земли, Богородице Приснодево! Ходатайством Твоим помилуй благочестивейшаго, самодержавнейшаго, великаго государя нашего, императора Николая Александровича всея России и весь царствующий дом, палату и все воинство их, и вся православныя христианы, сохраняющи их под кровом милости Твоея, ризою Твоею честною защити: и моли из Тебе воплощшагося без семени Христа Бога нашего, да препояшет ны свыше силою на вся видимыя и невидимыя враги нашя, на иноплеменники и единоплеменники, воюющыя на нас и на веру нашу православную. Спаси же и помилуй, Госпоже, святейший правительствующий синод и преосвященныя митрополиты, архиепископы и епископы православныя, иереи же и диаконы, и весь причет церковный, и вся правоверныя люди, покланяющыяся и молящыяся пред честною Твоею иконою. Призри на всех нас призрением милостивнаго Твоего заступления, воздвигни нас из глубины греховныя, и просвети очи сердечныя ко зрению спасения: милостива нам буди зде, и на Страшнем Суде Сына Твоего о нас умоли: преставльшыяся во благочестии от жития сего рабы Твоя в вечней жизни со Ангелы и Архангелы и со всеми святыми причти, да одесную Сына Твоего и Бога предстанут: и молитвою Твоею сподоби вся православныя христианы со Христом жити и радости ангельския в небесных селениих наслаждатися. Ты бо еси, Госпоже, слава небесных и упование земных, Ты наша надежда и Заступница всех притекающих к Тебе и Твоея святыя помощи просящих, Ты Молебница наша теплая к Сыну Твоему и Богу нашему: Твоя матерняя молитва много может на умоление Владыки, и Твоим предстательством ко престолу благодати Пресвятых и Животворящих Его Таин приступати дерзаем, аще и недостойнии. Темже всечестный образ Твой и рукою Твоею держимаго Вседержителя видяще на иконе, радуемся грешнии, со умилением припа́дающе, и любовию сей целуем, чающе, Госпоже, Твоими святыми благоприятными молитвами доити небесныя безконечныя жизни и непостыдно стати в день Судный одесную Сына Твоего и Бога нашего, яко да славим Его, купно со Безначальным отцем, и Пресвятым, Благим, Животворящим и Единосущным Духом, во веки веков.