За нас на кресте пригвожденный, Иисусе Христе, Единородный Бога Отца Сыне, милости, любве и щедрот неисчерпаемая Бездно! Вем, яко грехов ради моих, от неизреченнаго человеколюбия, кровь Твою пролияти на кресте изволил еси, юже аз, окаянный и неблагодарный, доселе скверными моими де́лы попирах и ни во чтоже вменях. Ныне убо из глубины беззакония и нечистоты моея умныма очима на распятаго Тя на кресте Искупителя моего воззрев, со смирением и верою во глубине Твоего милосердия себе повергаю, грехов прощения сквернаго жития моего исправления прося. Милостив буди мне, Владыко и Судие мой, не отрини мя от лица Твоего, но всесильною Твоею рукою Сам мя к Тебе обрати и на путь истиннаго покаяния настави, да отныне положу спасения моего начало. божественными страданьми Твоими укроти моя плотския страсти: излиянною Твоею кровию очисти моя душевныя скверны: распятием Твоим распни мя мiру и похотем его: крестом Твоим огради мя от невидимых враг, ловящих душу мою. Плотию пригвоздивыйся, пригвозди страху Твоему плоть мою, да уклонився от зла, творю благо пред Тобою. Преклонивый главу Твою на кресте, к земли смирения приклони вознесенную мою гордыню: желчь устнами вкусивый, положи хранение нечистым устом моим: отверстое копием имеяй сердце, сердце чисто во мне созижди: всеми Твоими язвами, всего мя сладце в любовь Твою уязви, да Тебе Господа моего возлюблю всею душею, всем сердцем, всею крепостию и всем помышлением. Яви мне Себе Всеблагаго, избавляющаго душу мою от смерти: яви Себе Всесладкаго, услаждающаго мя в скорбех и напастех Твоею любовию, да егоже первее ненавидех, прогневлях, от себе изгонях и аки ко кресту грехи моими пригвождах, сего ныне возлюблю, радуяся прииму, и сладце крест Его до конца жизни моея понесу. Не даждь отселе, о Всеблагий Искупителю мой, моей воли совершатися, понеже зла есть и непотребна, да не паки впаду в тяжкую работу царствовавшаго во мне греха: но Твоя воля благая, спасти мя хотящая, да совершается во мне всегда, ейже мя вручая, Тебе распятаго Господа моего умным очесем моего сердца представляю и молю из глубины души, да и в разлучении моем от бреннаго моего тела, Тебе Единаго на кресте Твоем узрю, в руце защищения Твоего мя приемлюща и от воздушных духов злобы храняща, вселяюща же со грешники, покаянием Тебе благоугодившими.