Испра́вил еси́ ума́ твоего́ движе́ния, богому́дре, к сла́ве Спа́сове и испо́лнь прему́дрости боже́ственныя показа́лся еси́, Симео́не, Ду́хом Святым, возбужда́я к покая́нию с любо́вию ти вопию́щих:
Ра́дуйся, сто́лпе воздержа́ния;
ра́дуйся, о́бразе терпе́ния.
Ра́дуйся, тайнописа́телю му́дрый обоже́ния;
ра́дуйся, разруши́телю жесточа́йшаго окамене́ния.
Ра́дуйся, уста́ медоточи́вая, ка́плющая боже́ственную сла́дость;
ра́дуйся, о́блаче богонапое́нный, ро́су жи́зни источа́яй.
Ра́дуйся, я́ко апо́стольскую благода́ть изъявля́еши;
ра́дуйся, я́ко спаси́тельное блиста́ние возсиява́еши.
Ра́дуйся, свети́ло благода́ти всесве́тлое;
ра́дуйся, звездо́ Лу́чшаго незаходи́мая.
Ра́дуйся, исто́чниче во́д живоно́сных;
ра́дуйся, све́точу глаго́лов богодохнове́нных.
Ра́дуйся, преподо́бне Симео́не, све́та боже́ственнаго таи́нниче.