Ви́деша тя, бла́же́нне Силуа́не, насе́льницы горы афо́нския но́ваго свети́льника благода́ти Бо́жия, и́бо Бо́жиим произволе́нием яви́лся еси ми́ру я́ко му́ж ве́лий в по́двизех у́мнаго де́лания и ми́лостию его проника́л еси в глубины богосло́вия. сего ра́ди потеко́ша к тебе и́щущии душеспа́си́тельнаго наставле́ния и обрето́ша в тебе богому́драго учи́теля и́ноческаго равноа́нгельнаго жития. те́мже писания твоя, одушевле́нная дыха́нием Ду́ха Свята́го оста́вил еси на́м и мно́гия напита́л еси хле́бом уче́ния твоего. помози, о́тче свя́ты́й, все́м блужда́ющим в пусты́ни ми́ра обрести исто́чник жи́зни ве́чныя, озари словесы свои́ми ожесточе́нная сердца наша, да напои́мся струя́ми живоно́сными боже́ственнаго уче́ния, бла́года́рно воспева́юще тебе сицева́я:
Ра́дуйся, зри́телю боже́ственных виде́ний:
ра́дуйся, слы́шателю глаго́лов небе́сных.
Ра́дуйся, ду́хом озаре́нный богосло́вити творца:
ра́дуйся, того ми́лости и всепроще́ния пропове́дниче.
Ра́дуйся, я́ко моли́твами и по́двиги ра́зум ду́хо́вный стяжа́л еси:
ра́дуйся, я́ко мно́гия ко спа́се́нию приве́л еси.
Ра́дуйся, учи́телю христиа́нскаго соверше́нства:
ра́дуйся, исто́чниче богоду́хнове́нных поуче́ний.
Ра́дуйся, глубины та́ин бо́жиих словесы просты́ми яви́вый:
ра́дуйся, богому́дрый наста́вниче, руководя́й к небе́се́м верныя.
Ра́дуйся, дары ду́ха свя́та́го в се́рдце твое прие́мый:
ра́дуйся, путеводи́телю на́ш во оте́чество небе́сное.
Ра́дуйся, преподо́бне Силуа́не, пропове́дниче любви ко враго́м и наста́вниче смире́нию и моли́тве.