О Всемилостивая Госпоже, Царице Богородице, от всех родов Избранная и всеми роды небесными и земными Ублажаемая! Смиренно молимся Тебе: воззри милостивно на предстоящыя пред святою и чудотворною иконою Твоею люди сия, яко Тебе Самой ту̀ сущей, и приими молитвы и пение, со умилением Тебе ныне приносимыя от недостойных раб Твоих, и подаждь с верою просящым по коемуждо прошению исполнение. Ты, именуемая всех скорбящых радость, услыши нас скорбных: Ты, нарицаемая утоление печалей, утоли нашу печаль: Ты, купино неопалимая, сохрани мiр и всех нас от вредоносных огненных стрел врага: Ты, взыскание погибших, не попусти нам погибнути в бездне грехов наших: Ты, одигитрие, указуй нам правый путь ко спасению: Ты, неувядаемый цвете чистоты, подаждь, нам помощь, плотскою страстию обуреваемым, и сердца̀ наша уцеломудри: Ты, Боголюбивая скоропослушнице, услыши в час сей молитву нашу: Ты, Заступнице усердная, Мати Господа Вышняго и нашя Мати и Надеждо, облегчи скорбь нашу: немощным здравие даруй, разслабленныя и недужныя исцели и от одра болезни возстави, прокаженныя очисти, слепым зрение даруй, бесны́я от бесов свободи, обидимыя от обид избави, скорбящым утешение низпосли, вдовицы и сирыя защити, грешныя к покаянию призови и на путь спасения направи, кающымся прощение даруй, старость поддержи, юныя настави, малыя дети сохрани, в до́мех мир и дружелюбие утверди, путешествующым спутешествуй, в морях плавающым буди добрая кормчая, и благотишие даруй: благочестивейшему государю нашему императору Николаю Александровичу на враги победу и одоление даруй: ереси и расколы искорени, отпадшыя от благочестивыя веры на путь правый обрати: страну нашу миром огради: всех же нас от внезапныя смерти сохрани, земли благоплодие и всякое душевному нашему и телесному здравию и спасению полезное даруй, вся бо ходатайством к Сыну Твоему, Христу Богу нашему, можеши. О Всепетая Мати, Пресвятая Дево Богородице! Не престай молитися о нас недостойных, ко пречистому образу Твоему со умилением припадающих и со страхом и любовию на сей взирающих: услыши нас, Владычице, на Тя по Бозе едину надежду имущих. Прежде же отшедшыя отцы и матери, братию и сестры нашя упокой в селениих святых, в месте злачне, в месте покойне, идеже несть печаль и воздыхание. Егда же приспеет и наше от жития сего отшествие и к вечней жизни преселение, предстани нам, преблагословенная надеждо наша, и даруй намхристианскую кончину безболезнену, непостыдну, мирну и Святых Таин причастну, да и в будущем веце сподобимся вси, купно со всеми святыми, безконечныя блаженныя жизни во Царствии возлюбленнаго Сына Твоего, Господа нашего Иисуса Христа, Емуже подобает всякая слава, честь и поклонение, со Безначальным Его Отцем, и Пресвятым и Благим и Животворящим Его Духом, ныне и присно и во веки веков.