Гдⷭ҇и, ѹ҆слы́шахъ слꙋ́хъ тво́й, и҆ ѹ҆боѧ́хсѧ: гдⷭ҇и, разꙋмѣ́хъ дѣла̀ твоѧ̑, и҆ ѹ҆жасо́хсѧ.
Посредѣ̀ двою̀ живѡ́тнꙋ позна́нъ бꙋ́деши. внегда̀ прибли́житисѧ лѣ́тѡмъ, позна́ешисѧ: внегда̀ прїитѝ вре́мени, ꙗ҆ви́шисѧ: внегда̀ смꙋти́тисѧ дꙋшѝ мое́й во гнѣ́вѣ, млⷭ҇ть твою̀ помѧне́ши.
Бг҃ъ ѿ ю҆́га прїи́детъ, и҆ ст҃ы́й и҆з̾ горы̀ приѡсѣне́нныѧ ча́щи.
Покры̀ небеса̀ добродѣ́тель є҆гѡ̀, и҆ хвалы̀ є҆гѡ̀ и҆спо́лнь землѧ̀.
И҆ сїѧ́нїе є҆гѡ̀ ꙗ҆́кѡ свѣ́тъ бꙋ́детъ, ро́зи въ рꙋка́хъ є҆гѡ̀: и҆ положѝ любо́вь держа́внꙋ крѣ́пости свое́й.
Пред̾ лице́мъ є҆гѡ̀ пред̾и́детъ сло́во, и҆ и҆зы́детъ на по́ле за пѧ́тꙋ є҆гѡ̀.
Ста̀, и҆ подви́жесѧ землѧ̀: призрѣ̀, и҆ раста́ѧша ꙗ҆зы́цы.
Стры́шасѧ го́ры нꙋ́ждею, и҆ раста́ѧша хо́лми вѣ́чнїи, шє́ствїѧ вѣ́чнаѧ и҆́хъ.
За трꙋ́дъ ви́дѣша селє́нїѧ є҆fїѡ́пскаѧ, ѹ҆боѧ́тсѧ и҆ кро́вы землѝ мадїа́мскїѧ.
Є҆да̀ въ рѣка́хъ прогнѣ́ваешисѧ, гдⷭ҇и; є҆да̀ въ рѣка́хъ ꙗ҆́рость твоѧ̀; и҆лѝ въ мо́ри ѹ҆стремле́нїе твоѐ;
Ꙗ҆́кѡ всѧ́деши на ко́ни твоѧ̑, и҆ ꙗ҆жде́нїе твоѐ спасе́нїе.
Налѧца́ѧ налѧче́ши лꙋ́къ тво́й на ски́птры, глаго́летъ гдⷭ҇ь.
Рѣка́ми разсѧ́детсѧ землѧ̀, ѹ҆́зрѧтъ тѧ̀, и҆ поболѧ́тъ лю́дїе.
Расточа́ѧ во́ды ше́ствїѧ̀: дадѐ бе́здна гла́съ сво́й, высота̀ привидѣ̑нїѧ своѧ̑.
Воздви́жесѧ со́лнце, и҆ лꙋна̀ ста̀ въ чи́нѣ свое́мъ.
Во свѣ́тъ стрѣ́лы твоѧ̑ по́йдꙋтъ, въ блиста́нїи мо́лнїй ѻ҆рꙋ́жїй твои́хъ.
Преще́нїемъ ѹ҆ма́лиши зе́млю, и҆ ꙗ҆́ростїю низложи́ши ꙗ҆зы́ки.
И҆зше́лъ є҆сѝ на спасе́нїе люде́й твои́хъ, спастѝ пома̑занныѧ твоѧ̑ прише́лъ є҆сѝ.
Вложи1лъ є3си2 во главы6 беззак0нныхъ смeрть, воздви1глъ є3си2 ќзы дaже до вhи въ конeцъ.
Разсѣ́клъ є҆сѝ во и҆зстꙋпле́нїи главы̑ си́льныхъ, стрѧсꙋ́тсѧ въ не́й: разве́рзꙋтъ ѹ҆зды̑ своѧ̑, ꙗ҆́кѡ снѣда́ѧй ни́щїй та́й.
И҆ возве́лъ є҆сѝ на мо́ре ко́ни твоѝ, смꙋща́ющыѧ во́ды мнѡ́ги.
Сохрани́хсѧ, и҆ ѹ҆боѧ́сѧ се́рдце моѐ, ѿ гла́са моли́твы ѹ҆сте́нъ мои́хъ.
И҆ вни́де тре́петъ въ кѡ́сти моѧ̑, и҆ во мнѣ̀ смѧте́сѧ крѣ́пость моѧ̀.
Почі́ю въ де́нь ско́рби моеѧ̀, да взы́дꙋ въ лю́ди прише́льствїѧ моегѡ̀.
На }: Занѐ смо́ковь не плодопринесе́тъ, и҆ не бꙋ́детъ ро́да въ лоза́хъ.
Солже́тъ дѣ́ло ма́слинное, и҆ полѧ̀ не сотворѧ́тъ ꙗ҆́ди.
На ѕ҃: Ѡ҆скꙋдѣ́ша ѻ҆́вцы ѿ пи́щи, и҆ не бꙋ́детъ волѡ́въ при ꙗ҆́слехъ.
А҆́зъ же ѡ҆ гдⷭ҇ѣ возра́дꙋюсѧ, возвеселю́сѧ ѡ҆ бз҃ѣ сп҃сѣ мое́мъ.
На д҃: Гдⷭ҇ь бг҃ъ мо́й си́ла моѧ̀: и҆ ѹ҆чини́тъ но́зѣ моѝ на соверше́нїе.
И҆ на высѡ́каѧ возво́дитъ мѧ̀, побѣди́ти мѝ въ пѣ́сни є҆гѡ̀.
Слaва, и3 нhнэ: