Согрѣши́хъ къ тебѣ̀ сп҃се, ꙗ҆́кѡ блꙋ́дный сы́нъ, прїими́ мѧ ѻ҆́§е ка́ющагосѧ, и҆ поми́лꙋй мѧ̀ бж҃е.
Сла́ва: Зовꙋ̀ къ тебѣ̀ хрⷭ҇тѐ сп҃се, мытаре́вымъ гла́сомъ: ѡ҆чи́сти мѧ̀ ꙗ҆́коже ѻ҆́наго, и҆ поми́лꙋй мѧ̀ бж҃е.
И҆ ны́нѣ: Бцⷣе, не пре́зри мѧ̀, тре́бꙋюща застꙋпле́нїѧ твоегѡ̀: на тѧ́ бо ѹ҆пова̀ дꙋша̀ моѧ̀, поми́лꙋй мѧ̀.
҆҆ Гдⷭ҇и поми́лꙋй, м҃. и҆ мл҃тва:
ВLко гдⷭ҇и вседержи́телю и҆ тво́рче всѣ́хъ, щедро́тъ ѻ҆ц҃ъ, и҆ млⷭ҇ти бг҃ъ, ѿ землѝ созда́вый человѣ́ка, и҆ показа́вый є҆го̀ по ѡ҆́бразꙋ твоемꙋ̀ и҆ по подо́бїю, да и҆ тѣ́мъ просла́витсѧ великолѣ́пое и҆́мѧ твоѐ на землѝ, и҆ и҆сто́ргнена ѹ҆́бѡ престꙋпле́нїемъ
твои́хъ за́повѣдей, па́ки на лꙋ́чшее возсозда́вый є҆го̀ во хрⷭ҇тѣ̀ твое́мъ, и҆ возведы́й на нб҃са̀: бл҃годарю́ тѧ, ꙗ҆́кѡ ѹ҆мно́жилъ є҆сѝ на мнѣ̀ вели́чїе твоѐ, и҆ не пре́далъ мѧ̀ є҆сѝ врагѡ́мъ мои̑мъ въ коне́цъ, и҆сто́ргнꙋти мѧ̀ и҆́щꙋщымъ въ про́пасть а҆́довꙋ: нижѐ ѡ҆ста́вилъ
мѧ̀ є҆сѝ поги́бнꙋти со беззако́ньми мои́ми. ны́нѣ ѹ҆́бѡ, многомлⷭ҇тиве и҆ любобл҃же гдⷭ҇и, не хотѧ́й сме́рти грѣ́шнагѡ, но ѡ҆браще́нїѧ ѡ҆жида́ѧй, и҆ прїе́млѧй, и҆́же низве́ржєнныѧ и҆справлѧ́ѧй, сокрꙋшє́нныѧ и҆сцѣлѧ́ѧй, ѡ҆братѝ и҆ менѐ къ покаѧ́нїю, и҆ низве́рженнаго и҆спра́ви,
и҆ сокрꙋше́ннаго и҆сцѣлѝ: помѧнѝ твоѧ̑ щедрѡ́ты, и҆ є҆́же ѿ вѣ́ка твою̀ непостижи́мꙋю бл҃гость, и҆ моѧ̑ безмѣ̑рнаѧ забꙋ́ди беззакѡ́нїѧ, ꙗ҆̀же дѣ́ломъ и҆ сло́вомъ и҆ мы́слїю соверши́хъ, разрѣшѝ ѡ҆слѣпле́нїе се́рдца моегѡ̀, и҆ да́ждь мѝ сле́зы ѹ҆миле́нїѧ на ѡ҆чище́нїе скве́рны
мы́сли моеѧ̀. ѹ҆слы́ши гдⷭ҇и, вонмѝ чл҃вѣколю́бче, ѡ҆чи́сти бл҃гоꙋтро́бне, и҆ ѿ мꙋчи́тельства во мнѣ̀ ца́рствꙋющихъ страсте́й, ѻ҆каѧ́ннꙋю мою̀ дꙋ́шꙋ свободѝ: и҆ не ктомꙋ̀ да содержи́тъ мѧ̀ грѣ́хъ, нижѐ да возмо́жетъ на мѧ̀ бори́тель де́мѡнъ, нижѐ къ своемꙋ̀ хотѣ́нїю да веде́тъ
мѧ̀, но держа́вною твое́ю рꙋко́ю, є҆гѡ̀ влады́чества и҆схи́тивый мѧ̀, ты̀ црⷭ҇твꙋй во мнѣ̀, бл҃гі́й и҆ чл҃вѣколюби́вый гдⷭ҇и, и҆ всего̀ твоего̀ бы́ти, и҆ жи́ти мнѣ̀ про́чее по твое́й бл҃говолѝ во́ли. и҆ пода́ждь мѝ неизрече́нною бл҃гостїю, се́рдца ѡ҆чище́нїе, ѹ҆́стъ хране́нїе,
правотꙋ̀ дѣѧ́нїй, мꙋдрова́нїе смире́нное, ми́ръ помыслѡ́въ, тишинꙋ̀ дꙋше́вныхъ мои́хъ си́лъ, ра́дость дꙋхо́внꙋю, любо́вь и҆́стиннꙋю, долготерпѣ́нїе, бл҃гость, кро́тость, вѣ́рꙋ нелицемѣ́рнꙋ, воздержа́нїе ѡ҆бдержа́тельное, и҆ всѣ́хъ мѧ̀ бл҃ги́хъ плодѡ́въ и҆спо́лни, дарова́нїемъ
ст҃а́гѡ твоегѡ̀ д¦а. и҆ не возведѝ менѐ въ преполове́нїе дні́й мои́хъ, нижѐ неиспра́вленꙋ и҆ негото́вꙋ дꙋ́шꙋ мою̀ восхи́тиши: но соверши́ мѧ твои́мъ соверше́нствомъ, и҆ та́кѡ мѧ̀ настоѧ́щагѡ житїѧ̀ и҆зведѝ, ꙗ҆́кѡ да невозбра́ннѡ проше́дъ нача̑ла и҆ вла̑сти тьмы̀, твое́ю
бл҃года́тїю ѹ҆зрю̀ и҆ а҆́зъ непристꙋ́пныѧ твоеѧ̀ сла́вы добро́тꙋ неизрече́ннꙋю, со всѣ́ми ст҃ы́ми твои́ми: въ ни́хже ѡ҆ст҃и́сѧ, и҆ просла́висѧ всечⷭ҇тно́е и҆ великолѣ́пое и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ д¦а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.