Блꙋдни́цы сле́зы и҆ петрѡ́вы прїе́мый гдⷭ҇и, и҆ мытарѧ̀ ѡ҆правда́вый, и҆з̾ глꙋбины̀ воздохнꙋ́вша: и҆ менѐ во ѹ҆миле́нїи припа́дающа ѹ҆ще́дри сп҃се, и҆ поми́лꙋй мѧ̀.
Сла́ва: Прїимѝ ꙗ҆́кѡ мытарѧ̀ гдⷭ҇и, ꙗ҆́кѡ блꙋдни́цꙋ ѡ҆чи́сти мѧ̀ вLко, ꙗ҆́кѡ ханане́ю поми́лꙋй, по вели́цѣй твое́й млⷭ҇ти.
И҆ ны́нѣ: Мт҃и свѣ́та бл҃гослове́ннаѧ бцⷣе, моли́сѧ хрⷭ҇тꙋ̀ бг҃ꙋ совозсїѧ́ти ѹ҆́тро, и҆ ве́лїю млⷭ҇ть дꙋша́мъ на́шымъ.
҆҆ Гдⷭ҇и поми́лꙋй, м҃. и҆ мл҃тва:
Гдⷭ҇и бж҃е мо́й, є҆ди́нъ бл҃гі́й и҆ чл҃вѣколюби́вый, є҆ди́нъ млⷭ҇тивый и҆ кро́ткїй, є҆ди́нъ и҆́стинный и҆ првⷣный, є҆ди́нъ ще́дрый и҆ млⷭ҇тивый бж҃е на́шъ: да прїи́детъ си́ла твоѧ̀ на мѧ̀ грѣ́шнаго и҆ непотре́бнаго раба̀ твоего̀, и҆ да ѹ҆крѣпи́тъ мо́й
хра́мъ є҆ђлїемъ бж҃е́ственнагѡ ѹ҆че́нїѧ твоегѡ̀. вLко и҆ чл҃вѣколю́бче, любобл҃же, любобл҃гоꙋтро́бне, просвѣтѝ моѧ̑ ѹ҆трѡ́бы, и҆ всѧ̑ ѹ҆́ды твое́ю во́лею: ѡ҆чи́сти мѧ̀ ѿ всѧ́кїѧ ѕло́бы и҆ грѣха̀, соблюди́ мѧ нескве́рна, и҆ непоро́чна ѿ всѧ́кагѡ наи́тїѧ и҆ дѣ́йства дїа́волѧ, и҆
да́рꙋй мѝ по твое́й бл҃гости, твоѧ̑ разꙋмѣ́ти, твоѧ̑ мꙋ́дрствовати, и҆ въ твои́хъ хотѣ́нїихъ жи́ти, твоегѡ̀ стра́ха страши́тисѧ, є҆́же твори́ти тебѣ̀ бл҃гоꙋгѡ́днаѧ до послѣ́днѧгѡ моегѡ̀ и҆здыха́нїѧ, ꙗ҆́кѡ да по неисповѣди́мой твое́й млⷭ҇ти соблюде́ши моѐ тѣ́ло и҆ дꙋ́шꙋ, ѹ҆́мъ
же и҆ мы̑сли, неискꙋше́нъ всѧ́кїѧ сопротиволежа́щїѧ сѣ́ти хра́мъ. гдⷭ҇и мо́й гдⷭ҇и, покры́й мѧ̀ твои́мъ бл҃гоꙋтро́бїемъ, и҆ не ѡ҆ста́ви мѧ̀ грѣ́шнаго, и҆ нечи́стаго, и҆ недосто́йнаго раба̀ твоего̀: ꙗ҆́кѡ ты̀ є҆сѝ защи́титель мо́й гдⷭ҇и, и҆ ѡ҆ тебѣ̀ пѣ́нїе моѐ вы́нꙋ, и҆ тебѣ̀ сла́вꙋ
возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ д¦ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.