От суеты̀ житейския возни́кше и ума своего по́мыслы во едино собра́вше, ко Твоей, Богородице, иконе очи душ и теле́с наших воздвиза́ем, и тебе взываем си́це: не остави, Пречистая, нас немощны́х во гресе́х наших растле́тися, не попустѝ злому демону ду́шы нашя от Сына Твоего в дебри страстей отгна́ти, но помози нам Того заповеди присно па́мятовати, да нижѐ блудным возбеше́нием себе предае́м, нижѐ друг друга зло́бою угрыза́ем, но я́коже днесь, святыни Твоей предстоя́ще, о направлении жития нашего ревностию распаля́емся, та́ко и от храма Твоего в домы своя отше́дше, сие доброе намерение сохрани́ти потщи́мся.
По сих же и телесныя нашя ну́жды утолѝ, и го́рести Твоею молитвою исцелѝ, Всепетая. Ве́мы, яко подоба́ше нам па́че вся сия благодушне претерпева́ти и то́чию о терпении в ско́рбех Господа проси́ти: но поне́же изнемога́ют в печа́лех ду́шы на́шя и по́мыслы уныния нашу коле́блют веру, сего ради в сокрушении сердец к тебе сице взыва́ем. Якоже безчисленныя боля́щыя страдальцы исцелила еси и скорбящыя уте́шила еси, та́ко и нас пред чудотворною Твоею иконою припа́дающих и в ско́рби Тебе молящихся услыши, и всех прошения во благое исполни, болящым здравие, скорбящым утешение подающи, во вражде су́щым мир от Бога низпосылающи, сомня́щымся же веры утверждение.
Услыши грешныя рабы̀ Твоя, Пречистая, воздви́гни нас на благодарственное Ти славословие, да умножится вера людей Твоих, да прославится в них Твое заступление, да та́ко Царствие Сына Твоего посредѐ нас утверди́тся, емуже подобает всякая слава, честь и поклонение, со Безначальным Его Отцем, со Пресвятым и Благим и Животворящим Его Духом, ныне и присно и во веки веков.