Боже великий и дивный, неисповедимою благостию и богатым промыслом управляяй всяческая, егоже премудрыми, но неиспытанными судьбами разнообразныя пределы жизнь и сожительство человеческое приемлет! Благодарне исповедуем, яко не по беззаконием нашым сотворил еси нам, ниже по грехом нашым воздал еси нам. Согрешихом, Господи, и беззаконновахом, и крайняго Твоего отвращения достойни сотворихомся. Ты же, о неисчетная благостыня, милостивый и долготерпеливый, и каяйся о злобах человеческих Владыко, наказав нас кратким бывшия печали посещением, се изобильно исполнил еси велелия и радости сердца̀ наша, оправдав над нами царствовати возлюбленнаго Тобою раба Твоего, благочестивейшаго, самодержавнейшаго, великаго государя нашего, императора Николая Александровича всея России. Умудри убо и настави его непоползновенно проходити великое сие к Тебе служение: даруй ему разум и премудрость, во еже судити людем Твоим в правду, и Твое сие достояние в тишине и без печали сохранити. Покажи его врагом победительна, злодеем стра́шна, добрым милостива и благонаде́жна. Согрей сердце его к призрению нищим, ко приятию странным, к заступлению напаствуемым. Подчиненная же ему правительства управляя на путь истины и правды, и от лицеприятия и мздоприимства отражая, и вся от Тебе державе его врученныя люди в нелицемерней содержа верности: сотвори его отца о чадех веселящеся, и ла удивиши милости Твоя на нас. Умножи дни жития его в нерушимем здравии и непременяемем благополучии: даруй же во дни его и всем нам мир, безмолвие и благопоспешество, благорастворение воздуха, земли плодоносия, и вся ко временней и вечней жизни потребная. О Премилосердый Господи наш, Боже щедрот и Отче великия утехи! Не отврати лица Твоего от нас и не посрами нас от чаяния нашего, уповающе на Тя молимся Тебе, и молящеся на щедроты Твоя уповаем. Ты бо един веси, еже требуем, и прежде прошения подаеши, и дарования утверждаеши, и всякое даяние благо, и всяк дар совершен свыше есть, сходяй от Тебе Отца светов: Тебе слава и держава, со Единородным Твоим Сыном, и Всесвятым и Благим и Животворящим Твоим Духом, ныне и присно и во веки веков.