О Пресвятая Дево, Владычице Богородице, Единароднаго Бога Слова, всякия видимыя и невидимыя твари Творца и Владыку, Единаго от Троицы Господа, Бога же и человека, паче естества и слова рождшая, вместилище Божественное, всякия святыни и благодати Приемнице, в Нейже исполнение Божества пребывает, благословением Бога и Отца и действом Святаго Духа избранная от всея твари, славо и неизглаголанное веселие Ангелов, царский апостолов и пророков ве́нче, чудное и всехвальное мучеников мужество и страдальцев венчание, присносущных и нетленных воздаяний Ходатаице непреложная, преподобных честь и славо, незаблуднаго пути Учительнице, источниче света, милости неистощимая реко, всяких чудес и дарований духовных море неисчерпаемое! Тебе молимся и Тебе просим, милостивную Матерь Человеколюбца Владыки, помиловатися нам смиренным и недостойным рабом Твоим: призри милостивно на пленение наше и исцели сокрушение душ и телес наших, видимыя и невидимыя рати разори, и всяко столп крепости, оружие во бранех, Воевода и Поборница непобедимая буди нам недостойным от лица враг наших, покажи на нас древния милости и чудеса Твоя. Яко един есть Царь и Владыка Сын Твой и Бог, Ты же воистинну еси Богородица, от всех родов блажи́мая, истиннаго Бога по плоти рождшая, и того ради вся можеши и сильна̀ еси действовати, елика аще волиши на небеси и на земли. Исполни убо всякое прошение на пользу коемуждо, Владычице: подаждь недугующым цельбу, в мори плавающым тишину и управление, с путешествующими спутешествуй и соблюдай я, скорбящыя утешай, нищету и всякое телесное озлобление облегчи, душевныя же болезни и страсти телесныя прежде всех потреби Твоим невидимым предстательством и ходатайством, яко да путь временныя сея жизни добре и непреткновенно скончаем, и вечная оная блага Тебе ради во Царствии Небеснем получим. Вернаго же императора нашего Николая Александровича, на Твое предстательство уповающаго и Тебе яко Ходатаицу и Помощницу на обстоящыя враги призывающаго, невидимо укрепи: отъими болезни души и сердца его, державу его мирну и непоколебиму сохрани, и от бед избави, Владычице, молитвами Твоими. Изряднее же Тебе вручаемый град сей и всяк град и страну от глада, губительства, труса, потопа, огня и меча, от нахождения иноплеменных и междоусобныя брани и от напрасныя смерти избави, и всяк гнев праведно на ны движимый отврати, благоволением и благодатию единороднаго Сына Твоего, Емуже подобает всякая слава, честь и поклонение, со Безначальным Его Отцем и Присносущным и Животворящим Духом, ныне и присно и во веки веков.