О всеблаженнии и многострадальнии святии страстотерпцы, тричи́сленнии мученицы Гу́рие, Само́не и Ави́ве, веры православныя побо́рницы, безбожия и́дольскаго обличители, врагов прогони́тели, обидимых заступницы и всех христиан те́плии предста́телие! О велицыи страдальцы и угодницы Христовы, исповедницы всесветлии! Помилуйте нас грешных и недостойных, в беда́х, ско́рбех и печалех и во всякой злой напасти пребывающих: изба́вите нас от оби́дящих и ненави́дящих нас, от враг видимых и невидимых и от всякаго злаго человека: и якоже изба́висте отрокови́цу от горькия смерти, во гробе от злаго воина Го́тфина жи́ву затворе́нную, тако и ныне по данней вам от Бога благодати, в супружестве убо живущыя в любви и единомыслии соблюдите, всех же нас в вере и благочестии утвердите и от находящих на ны̀ зол во временней сей жизни изба́вите. О велицыи поборницы Гу́рие, Само́не и Ави́ве, во́ини Небеснаго Царя! Не забудите нас, всегда вам молящихся и помощи вашея просящих, но предстояще у престола Вседержителева, молитеся о нас грешных и недостойных, подати нам оставление грехов, да от вечнаго мучения избавльшеся, получим от Бога неизреченная блага, яже уготова Господь любящим Его. Яко подобает Ему всякая слава, честь и поклонение, Отцу и Сыну и Святому Духу, ныне и присно и во веки веков.