О великий и преславный пророче Божий Илиѐ, ревности ради твоея̀ по славе Господа Бога Вседержителя не терпевый зре́ти идолослужения и нечестия сынов израилевых, законопреступнаго царя Ахава обличивый и в наказание тех триле́тный глад на землю израилеву молитвою твоею от Господа испроси́вый, вдовицу саре́птскую во гладу пречудно препита́вый и сына ея̀ уме́рша молитвою твоею воскреси́вый, по прошествии же пронарече́ннаго времене глада, собранный на гору карми́льскую народ израильский в богоотступстве и нечестии укори́вый, таже огонь молитвою на жертву твою с небесѐ испроси́вый, и чудом сим Израиля ко Господу обрати́вый, сту́дныя же пророки ваа́ловы посрами́вый и умертви́вый, по сих же молитвою па́ки небо разреши́вый и обильный дождь на землю испросивый, и люди израилевы возвесели́вый! К тебе, предивный угодниче Божий, усердно прибегаем гре́шнии и смире́ннии, бездо́ждием и зно́ем томи́мии. Исповедуем, яко недосто́йни есмы̀ милости и благодеяний Божиих, достойни же паче лютых прещений гнева твоего. Не бо̀ ходи́хом во страсе Божии и в путе́х заповедей Его, но в по́хотех развраще́нных сердец наших, и всякий вид греха безстудне сотворихом: се бо беззакония наша превзыдо́ша главу нашу, и не́смы достойни явитися пред лице Божие и зрети на небо. Темже исповедуем смиренно, яко сего ради заключися небо и а́ки медя́но сотворися, занѐ первее заключися наше сердце от милосердия и истинныя любве: сего ради отвердѐ земля и соде́лася безплодна, яко Господу нашему плодов добрых дел не принесохом: сего ради не бысть дождь, нижѐ роса̀, яко слез умиления и животворныя росы̀ богомыслия не и́мамы: сего ради увядѐ всяк злак и трава се́льная, яко и́зсше в нас всякое благое чувство: сего̀ ради омрачи́ся возу́х, яко ум наш сту́дными помышленьми омрачися и сердце наше беззаконными похотеньми осквернися. Исповедуем, яко недосто́йни есмы̀ и тебе, пророче Божий, умоляти. Ты бо, подобострастен быв нам человек, Ангелом в житии твоем уподобился еси, и аки безплотный, на небо восхище́н еси: мы же сту́дными помыслы и дея́ньми нашими безсловесным ското́м уподо́бихомся, и душу нашу яко плоть сотворихом. Ты посто́м и бдением Ангелы и челове́ки удивил еси: мы же невоздержанию и сластолюбию предаю́щеся, ското́м несмысленным уподобляемся. Ты презе́льною ревностию о славе Божией непрестанно горел еси: мы же, о славе нашего Творца и Господа небрегу́ще, испове́довати достопокланяемое имя Его зле стыди́хомся. Ты нечестие и злыя обычаи искоренял еси: мы же духу века сего порабо́тахом, обычаи мiра паче заповедей Божиих и уставов церковных блюдуще. Кий убо грех и неправду не сотворихом мы окая́ннии! И тако беззаконьми нашими долготерпение Божие истощи́хом. Темже правосудный Господь праведно прогневася на нас, и во гневе Своем наказа̀ нас. Обаче, ведуще велие дерзновение твое пред Господем и на любовь твою к роду человеческому уповающе, дерза́ем моли́ти тя, прехвальне пророче: милостив буди к нам недостойным и непотребным, умоли Великодаровитаго и Всещедраго Бога, да не до конца прогневается на ны̀ и да не погуби́т нас со беззаконьми нашими, но да низпо́слет на жаждущую и изсохшую землю дождь обильный и мирный, да дарует ей плодоносие и благорастворение возду́ха: преклонѝ действенным твоим хода́тайством на милость Царя Небеснаго, не нас ради грешных и скверных, но ради избра́нных рабов Его, колена свои пред ваалом мiра сего не преклонивших, ради незло́бивых младенцев, ради безсловесных ското́в и птиц небесных, за наша беззакония страждущих и гладом, зноем и жаждою истаява́ющих. Испросѝ нам твоими благоприятными молитвами от Господа дух покаяния и сердечнаго умиления, дух кротости и воздержания, дух любве и терпения, дух страха Божия и благочестия, да тако, от стезѝ нечестия на правый путь добродетели возвратившеся, ходим во свете заповедей Божиих и достигнем обетова́нных нам благих, благоволением Безначальнаго Отца, человеколююием Единороднаго Сына Его и благодатию Всесвятаго Духа, ныне и присно и во веки веков.