Како похва́лим тебе, в земных владыках премужественный Владимире? Как ти благодарение воздади́м, яко тобою Господа позна́хом и лести идольския избы́хом, яко твоим повелением по всей земли нашей Христос славится? Како веровал еси? како Христа взыскал еси? пове́ждь нам, ча́дом твоим, отку́ду облагоуха̀ тя воня̀ Святаго Духа? Не видел еси Христа, ни ходил еси по нем: како ученик Его обрелся еси? не видел еси апостола, прише́дша в землю твою, не видел бесы изгоняюща именем Христовым, болящих исцеляюща, мертвых воскрешающа. Дивное чудо! Ини́и ца́рие и власти́теле, видяще вся сия бывающа от святых мужей, не вероваша, но паче на страсти и муки предаша их: ты же, о блаженне, не видя и не слышя всех сих, ко Христу притекл еси, разумев, яко Един есть Творец видимым и невидимым, небесным и земным, и яко посла в мiр, нашего ради спасения, возлюбленнаго Сына Своего. И сия помыслив, вшел еси во святую купель.
И ныне, девятѝ стом летом и мно́жае проте́кшым, при́зри на землю твою, виждь ча́да твоя, виждь крася́щаго стол землѝ твоея благочестивейшаго госуда́ря императора Николая Александровича, возра́дуйся и возвесели́ся. Виждь люди твоя, како живут, како храни́ми суть Господем, како благоверие хранят по преданию твоему, како славят Христа, како покланя́ются имени Его. Виждь и гра́ды величеством сияющыя, виждь церкве цветущыя, виждь христианство растущее, виждь и град твой Киев толикими угодники Божиими, во нетле́нии почивающими, блистающийся, и фимиа́мом облагоуха́емь, и хвала́ми и божественными пе́нии святыми оглаша́емь.
Видя же, яко твое верное сияние твоим хода́тайством и заступлением не изсуше́но бысть зно́ем неверия, но дожде́м Божия поспешения плод изоби́льный принесѐ, радуйся духом, во владыках апостоле, не ме́ртвая телеса̀ возста́вивый, но душе́ю ны̀ ме́ртвыя воскреси́вый! Радуйся, уте́шителю наш и наста́вниче благове́рия!
Ты был еси, о честна́я главо̀, наги́м одеяние, а́лчущым кормитель, вдовицам помощник, странным поко́ище, обидимым заступник, убогим обогащение. Сим благим делом на небесе́х возмездие прие́мля и зрение сладкаго лица Божия насыщаяся, не престай моляся о земли твоей и о чадех, в нихже благоверно владычествовал еси, паче же о благочести́вейшем госуда́ре императоре Николае Александровиче, да сохранит я̀ в мире и благоверии, пре́даннем тобою, и да при́сно славится в землѝ нашей правоверие, и да не оставит нас Господь, а́ще и ещѐ блуждаем толи́ким веко́м проте́кшым, а́ще и ещѐ согреши́м Господу и Владыце нашему, а́ки новоку́пленнии рабѝ, не могу́щии угоди́ти господину своему. К тебе руки нашя воздева́ем и молим тя: помоли́ся Владыце всех, да продлит, доне́леже стои́т мiр, милость Свою на отечествии нашем и людех Своих, враги прогоняя, мир утверждая, от глада избавляя, царѝ нашя соделовая гро́зны супоста́том, боляры наставляя, гра́ды устрояя, Церковь Свою возраща́я, достояние Свое соблюдая, му́жи и жены̀ и младенцы спасая, да милостию Его храни́ми, во единении веры вкупе весело и радостно славим Господа нашего Иисуса Христа, со Отцем и со Пресвятым Духом, Троицу Нераздельную и Единобожественную, царствующую на небесех и на земли, ныне и присно и во веки веков.