О Пресвятая Дево, Мати Господа вышних сил, небесе и земли Царице, гра́да и страны̀ нашея всемощная Заступнице! Приими хвалебное пение сие от нас недостойных раб Твоих, и вознеси молитвы нашя ко престолу Бога Сына Твоего, да милостив будет неправдам нашым и проба́вит благодать Свою чтущим всечестное имя Твое и с верою и любовию покланя́ющымся пречистому [или чудотворному] образу Твоему. Несмы бо достойни от Него помиловани быти, аще не Ты уми́лостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомне́нней и ско́рей Заступнице нашей: услыши нас молящихся Тебе, удиви над нами великия и богатыя милости Твоя, яви нам небесную помощь Твою и заступление, и испросѝ у Бога Сына Твоего пастырем нашым ревность и бдение о душах, градоправи́телем мудрость и силу, судия́м правду и нелицеприятие, наставником разум и смиренномудрие, супругам любовь и согласие, ча́дом послушание, обидимым терпение, обидящым страх Божий, скорбящым благодушие, радующымся воздержание: нам же всем низпосли дух разума и благочестия, дух милосердия и кротости, дух чистоты и правды. Ей, Госпоже Пресвятая! Умилосердися на немощны́я люди Твоя: разсеянныя собери, заблу́ждшыя на путь правый настави, неду́гующыя уврачуй, старость поддержи, юныя уцелому́дри, младенцы воспитай, и при́зри на всех нас призрением милостиваго Твоего заступления: воздвигни нас из глубины греховныя и просвети сердечныя очи наши ко зрению спасения. Милостива нам буди зде и на Страшнем Суде Сына Твоего: преста́вльшыяся же в вере и покаянии от жития сего отцы и братию нашу в вечней жизни со ангелы и со всеми святыми жити сотворѝ. Ты бо еси, Госпоже, слава небесных и упование земных, Ты по Бозе наша Надежда и Заступница всех притекающих к Тебе с верою. Тебе убо молимся, и Тебе, яко всемогущей Помощнице, сами себе и друг друга и всю жизнь нашу предае́м, ныне и присно и во веки веков.