О предивный чудотво́рче и великий угодниче Божий, преподобне отче Анто́ние, пастырю наш добрый, теплый заступниче и скорый помощниче! Предстоя̀ престолу Пресвятыя Троицы, призри милостивым о́ком на ны и на вся люди, благоговейне притекающыя к честно́му гробу твоему, в немже лежащыя святыя мо́щи твоя, от дней древних нетле́нием цветущыя и благодатию Животворящаго Пресвятаго Духа благоуха́ющыя, исцеление от всяких недугов душевных и телесных неоску́дно источают: услыши нас молящихся тебе и чтущих святую память твою. Прострѝ ру́це твои ко Влады́це неба и земли, в твоих богоприятных молитвах поминай благочестивейшаго, самодержавнейшаго, великаго госуда́ря нашего, императора Николая Александровича всея̀ России и весь царствующий дом, святейший прави́тельствующий сино́д, святейшия вселенския патриа́рхи, преосвященныя митрополи́ты, архиере́и и епи́скопы, и весь свяще́ннический и монашеский чин, и весь при́чет церковный, и благоверных привительствующий синкли́т, военача́льники, градонача́льники, христолюбивое во́инство и вся православныя христианы, и испросѝ нам оставление прегрешений наших. Моли Милостиваго Бога отврати́ти от нас всякий гнев Его, праведно на ны дви́жимый, и сохрани не то́чию обитель нашу, но и вся гра́ды и ве́си, и вся страны̀ христианския, и люди живущия в них, от града и глада, от тру́са и потопа, от огня и меча, от нашествия иноплеме́нных и междоусо́бныя брани, от смертоно́сныя язвы и всякия па́губы и всякаго зла, дарова́ти же нам вся к жизни временней благопотребная и к вечному спасению полезная. Помозѝ нам святче Божий, избежа́ти пагубных сетей диавольских, препобеди́ти соблазны мíра и умертиви́ти у́ды нашя сущыя на землѝ: отвратѝ очи наши от суетных и преле́стных вещей земных, напра́ви же умы и мысли нашя ко зрению красоты Боже́ственныя, пренебесныя и нетленныя: сердца̀ наша, неду́гующия страстьми греховными, исцелѝ, да не прильпну́т сласте́м привременным и безме́стным: согрей же я̀ Боже́ственною любовию, да вожделе́ют истиннаго и непреходящаго блаженства, еже в Бо́зе. Укрепи нас во исполнение заповедей Господних, даждь нам покаяние сердечное и умиление сле́зное, молитву непрестанную и трудолюбие неосла́бное, бо́дренное трезве́ние ума и хранение сердца, мир по́мыслов, чистоту желаний, правоту̀ деяний, да изба́вльшеся тобою от всех враг видимых и невидимых, от всяких зол душевных и телесных, и соблю́дше веру пра́вую, надежду неотложную и любовь нелицемерную, богоуго́дне скончаем житие наше на земли, и преше́дше в жизнь вечную, сподо́бимся зре́ти трисветлую зарю Трисияющаго Вечнаго Солнца, и в невечернем дни Небеснаго Царствия, купно с тобою и со всеми святыми, благодарне воспевати и благословля́ти Пресвятую Троицу, Отца и Сына и Святаго Духа, во веки веков.