О преди́вный и всехва́льный угодниче Божий, преподобне отче Са́вво! Днесь во святе́м храме твоем, благогове́йно предстояще пред святою иконою твоею и радостно соверша́юще память твою, ублажа́ем тя, заступника нашего. Почита́юще же твое ве́лие дерзнове́ние пред Господем, смире́нно молим тя, преблаженне: приимѝ ми́лостивно от нас хвале́бное пение сие, от любвѐ и усердия тебе приноси́мое. И яко име́яй ве́лие дерзнове́ние ко Господу, потщи́ся богоприя́тным твоим хода́тайством испроси́ти у Царя царствующих и Господа госпо́дствующих, яко да проба́вит вели́кия и бога́тыя ми́лости Своя на нас грешных, да пода́ст нам дух пра́выя веры, дух ве́дения и любвѐ, дух мира и радости о Ду́се Свя́те, да избавит от бед и напастей, да низпо́слет вся полезная ко спасению душ наших. Благочести́вейшему же, самодержа́внейшему, великому государю нашему, императору Николаю Александровичу всея̀ России да да́рует долгоде́нствие и душе́вное спасение, на супоста́ты одоление, во устрое́нии царства благопоспеше́ние и на вся благая начинания благослове́ние, и всему царствующему дому премногую милость Свою и благоволе́ние. Святейшему же прави́тельствующему сино́ду да низпо́слет благодать Свою, пра́во пра́вити слово Христо́вы истины: начальником и судия́м да подаст мудрость и нелицеприятие. Всем же православным да низпо́слет мир, тишину, безмяте́жие, усердие ко исполнению заповедей Его, изобилие плодов земных: и да изба́вит всю Российскую страну от глада, губи́тельства, тру́са, потопа, огня, меча, нашествия иноплеме́нных и междоусо́бныя брани, смертоно́сныя язвы и от всякаго зла. Ей, угодниче Божий! Не пре́зри молений наших, но услы́ши нас моля́щихся тебе, и под кро́вом заступле́ния твоего сохрани нас [и обитель сию] ненаве́тны от враг видимых и невидимых, да сподо́бимся сконча́ти житиѐ наше в покаянии и восприи́мем вечная блага́я во Царствии Христа Бога нашего, иде́же восхва́лим с тобою и всеми святыми достопокланя́емое имя Пресвяты́я Троицы, Отца и Сына и святаго Духа, во веки веков.