О, Великий Христов Угодниче и преславный Целебниче Великомучениче Пантелеймоне! Душею на небеси престолу Божию предстояй и Триипостасныя Его славы наслаждаяйся, телом же и ликом святым на земле в Божественных храмах почиваяй и данной Ти свыше благодатью различныя источая чудесы, — призри милостивым Твоим оком на предстоящия люди и честней Твоей иконе, умильно молящеяся и просящия от Тебе целебные помощи и заступления; простри ко Господу Богу нашему теплые свои молитвы, испроси душам нашим оставление согрешений. Се бо мы за беззанония наша не смеюще возвести очес наших к высоте небесной, ниже вознести глас молебный к Его в Божестве неприступней славе; но сердцем сокрушенным и духом смиренным Тебе ходатая милостива ко Владыце, и молитвенника за ны грешные призываем, яко Ты приял еси благодать от Него недуги отгоняти и страсти исцеляти! Тебе убо просим: не презри нас недостойных, молящихся Тебе и Твоея помощи требующих! Буди нам в печалех утешитель, в недузех лютых — страждущих врач; напаствуемым — скорый покровитель; очесем недугующим — прозрения датель; ссущим и младенцем в скорбех — готовейший предстатель и исцелитель: исходатайствуй всем — вся ко спасению полезная, яко да Твоими ко Господу Богу молитвами получивши благодать и милость, — прославим всех благих Источника и Дароподателя, Бога Единаго, в Троице Святой Славимаго: Отца и Сына, и Святого Духа, ныне и присно, и во веки веков. Аминь.
Молитва святому великомученику Георгию
О, Всехвальный, Святый Великомучениче и Чудотворче Георгие! призри на ны скорой Твоею помощею, и умоли Человеколюбца Бога: да не осудит нас грешных по беззакониям нашим; но да сотворит с нами по велицей Своей милости! Не презри моления нашего, но испроси нам у Христа и Бога нашего; тихое и Богоугодное житие; здравие же душевное и телесное; земли плодородие и во всем изобилие; и да не во зло обратим благая, даруемая нам Тобой от Всещедраго Бога, но во славу Святого имени Его и в прославление крепкого Твоего заступления! Да подаст Он Православному Императору нашему и всему Боголюбивому воинству, на сопостаты одоление, и да укрепит Царство Его непременяемым миром и благословением; изряднее же, — да оградит нас Святых Ангел Своих ополчением, во еже избавитися нам, по исходе нашем из жития сего, от козней лукавого и тяжких воздушных мытарств его, и неосужденным предстати престолу Господа Славы! Услыши нас, Страстотерпец Христов Георгие, и моли за ны непрестанно Триипостаснаго Владыку всех и Бога: да благодатию Его и человеколюбием, Твоею же помощию и заступлением, — обрящем милость, — со Ангелы и Архангелы и всеми Святыми, одесную Правосудного Судии стати, и того выну славити, со Отцем и Святым Духом, ныне и присно и во веки веков. Аминь.
Молитва святому Архангелу Михаилу
Святый и великий Архангеле Божий Михаиле! Неисповедимыя и Пресущественныя Тройцы первый во Ангелех Предстоятелю; рода же человеческого приставниче и хранителю, сокрушивый с воинствы своими главу прегордого денницы (сатаны) на небеси и посрамляй выну злобу и коварства его на земли! К тебе прибегаем с верой, и Тебе молимся с любовию: буди щит несокрушим и забрало (наличник шлема) твердо Святей Церкви и православному Отечеству нашему, ограждая их молниеносным мечем твоим от всех враг, видимых и невидимых! Буди Ангел Хранитель; премудр советоподатель и способник Благочестивейшему Императору нашему, износя Ему от Престола Царя Царствующих, просвещение и силу; радость, мир и утешение! Буди Вождь и соратай непобедим — Христолюбивому воинству нашему, венчая его славой и победой над супостаты; да познают вси, противящиеся нам, яко с нами Бог и Святые Ангелы Его! Не остави же, о, Архангел Божий, помощию и заступлением твоим и нас, прославляющих днесь Святое имя Твое! Се бо, аще и многогрешны есмы; обаче не хощем в беззакониях наших погибнути, — но еже обратитися ко Господу и оживленным быти от Него на дела благие. Озари ум наш светом лица Божьяго, иже выну сияет на молниеносном челе Твоем: да возможем разумети, что есть воля Божия о нас благая и совершенная, и видети вся, яже подобает нам творити и яже — презирати и оставляти. Укрепи благодатию Господнею слабую волю и немощное произволение наше: да утвердившись в законе Господнем, — престанем прочее влаятися (подчиняться) земными помыслы и похотениями плоти, увлекайся по подобию неосмысленных детей, — скоро гибнущими красотами (прелестями, обольщениями) мира сего, яко ради тленнаго и земного, — безумно забывати — вечные небесные! Над всеми сими, испроси нам свыше дух истиннаго покаяния; нелицемерную печаль и Бозе и сокрушение о грехах наших: да остающееся нам число дней временного живота нашего иждивем (употребим) не во угождении чувств и работе страстем нашим; но во изглаждение зле содеянных нами, слезами веры и сокрушения сердечного; подвигами чистоты и святыми делами милосердия! Егда же приблизится час кончины нашея и освобождения от уз бренного сего тела, — не остави нас. Архангеле Божий, беззащитных, противу духов злобы поднебесных, обыкших преграждати душе человеческой восход в горняя: да охраняемы тобой, беспрекословно достигнем оных преславных селений райских, — иде же несть печаль, ни воздыхание, — но жизнь бесконечная, — и сподобльшеся узрети Пресветлое лице Всеблагого Господа и Владыки нашего, — падше, со слезами у ногу Его, — в радости и умилении воскликнем: Слава Тебе, Дражайший Искупителю наш, иже за премногую любовь твою к нам недостойным, благоволил еси послати Ангелы Твоя в служение спасению нашему. Аминь.