Ирмо́с: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.
Святи́телю о́тче Григо́рие, моли́ Бо́га о нас.
Престо́лу предстоя́, Григо́рие, Трисо́лнечнаго и Безнача́льнаго Божества́ и де́йством дово́льне насы́тився благода́тию, ю́же воспе́л еси́, соде́йственик и друго́в, ны́не воспомяну́вших тя́, помина́й.
Святи́телю о́тче Григо́рие, моли́ Бо́га о нас.
Обре́л еси́ возда́ние боле́зней твои́х, Ца́рство, о́тче, Бо́жие безнача́льное, е́же благоче́стне на земли́ воспропове́дал еси́, венцы́ триплете́ны восприя́л еси́ испове́дания боже́ственнаго, свяще́нства же и безмо́лвия.
Святи́телю о́тче Григо́рие, моли́ Бо́га о нас.
Яви́лся еси́ и́ночествующим похвала́, богосло́вец боже́ствен, свяще́нства же пра́вило изве́стное, сего́ ра́ди зде́ да́стся ти́ чуде́с Боже́ственная благода́ть, словеса́ твоя́ утвержда́я.
Сла́ва Отц́у и Сы́ну и Свято́му Ду́ху.
Зако́н похва́льных, пресла́вне, и слове́сных по́двиг вои́стину исше́д, и на земли́ живы́й, и исше́д от те́ла, но приими́ ма́лое пе́ние изря́днейши и проше́ния подава́й, тебе́ жела́ющих моли́твами твои́ми.
И ны́не и при́сно и во ве́ки веко́в. Ами́нь.
Уста́ стра́шнаго Рождества́ Твоего́ и богослове́сный язы́к, Влады́чице, бы́сть, е́же па́че естества́ от Тебе́ я́вльшагося обоже́ния честны́й Тво́й ра́б Григо́рий, его́же ны́не мольбы́ прие́млющи, спаси́ все́х.