Ирмо́с: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.
Святи́телю о́тче Григо́рие, моли́ Бо́га о нас.
Яви́лся еси́, о́тче, ве́сь све́тел, сла́достен, пра́в, кро́ток, ве́рою приходя́щим ти́ источа́я сла́дкое слове́с, Григо́рие, боже́ственное пи́во, все́х веселя́ благочести́вых сердца́, хапля́ неду́гующих душе́вными чу́вствы.
Святи́телю о́тче Григо́рие, моли́ Бо́га о нас.
Ум и язы́к, вои́стину благоро́ден, наказа́ние же и словеса́ се́рдце очище́но обре́т, Бо́жия в тя́ всели́ся Прему́дрость, е́йже дру́г дру́гу сосвяза́вшися, о́тче, чу́до все́м стра́нно показа́ тя мíрови.
Святи́телю о́тче Григо́рие, моли́ Бо́га о нас.
В пещи́ де́ти неврежде́ны евре́йския показа́ держа́ва благоче́стия, и́мже подо́бяся, прему́дре, пла́мень удержа́л еси́ злоче́стия посреди́ пе́щи искуше́ний, и до́блествене поя́ Влады́ку, и опаля́я гоня́щия.
Сла́ва Отц́у и Сы́ну и Свято́му Ду́ху.
Умнаго погрузи́л еси́ фарао́на тече́ньми твои́х сле́з и все́ еги́петское потопи́л еси́ во́инство, возше́л еси́ на го́ру безстра́стия, побива́я отту́ду Ду́ха си́лою полки́ бори́тель, я́коже Моисе́й вели́кий.
И ны́не и при́сно и во ве́ки веко́в. Ами́нь.
Све́тлый благода́ти, Чи́стая, пропове́дник и богосло́вец Ду́ха, Богоро́дице, да́ннаго Тобо́ю мíрови, ны́не словесы́ торжеству́я пе́ние, пе́сни же и ли́ки вся́ Ти́ собира́ет, я́ко ве́рный ра́б, па́мять Твою́ сла́вя.