Ирмо́с: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, мíр обнови́, во чре́ве Твое́м всеце́л, хва́льный отце́в Бо́г и препросла́влен.
Святи́телю о́тче Григо́рие, моли́ Бо́га о нас.
Я́коже гро́ма гла́с твои́х веле́ний и слове́с боже́ственных молниеужа́сных зре́ти я́вствене, о́тче, не возмога́ют пре́лестию плене́ннии и осяза́ют, я́коже пи́шет, я́ко слепы́й, ны́не сте́ны сме́шне безу́мнии.
Святи́телю о́тче Григо́рие, моли́ Бо́га о нас.
Но́щь не светла́ непокори́вым бы́сть, и ны́не Све́т Есте́ственный — Ца́рство Сла́вы Бо́жия, и́же яви́ таи́нником Человеколю́бец на фаво́рстей, Григо́рие, е́юже, причасти́вся дово́льне, приобща́ешися угоди́вшим.
Сла́ва Отц́у и Сы́ну и Свято́му Ду́ху.
Иже нечести́ве в благода́ть, пресла́вне, поху́лившим Бо́жие безмо́лвие и моли́тву, обоже́нию же неизрече́нному скве́рне насмея́вшихся, те́х посрами́в, отгна́л еси́ Боже́ственнаго двора́, его́же соблюда́еши всегда́ твои́ми мольба́ми.
И ны́не и при́сно и во ве́ки веко́в. Ами́нь.
Прииди́ ны́не в на́шу по́мощь, спасе́ние о́бщее, Григо́риевы моли́твы прие́млющи, Влады́чице, стра́сти у́бо усыпа́ющи душе́вныя и теле́сныя и о́бщий мяте́ж и тле́ние вско́ре разреша́ющи.