Ирмо́с: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.
Пресвята́я Богоро́дице, спаси́ нас.
По́йте, и́ноцы Афо́нстии, благословля́й, оби́тель Зогра́фская, Благу́ю Влады́чицу, Засту́пницу Всеми́лостивую, покро́вом Свои́м правосла́вныя лю́ди покрыва́ющую, ерети́ческих же вся́ за́мыслы разруша́ющую.
Пресвята́я Богоро́дице, спаси́ нас.
Хотя́ху иногда́ папослужи́телие всю́ го́ру Афо́нскую мече́м плени́ти, и вся́ и́ноки во свою́ па́губную е́ресь обрати́ти, но заступле́нием Твои́м, Влады́чице, Госпо́дь сотре́ горды́ню и́х, те́мже превозно́сим Тя́ во ве́ки.
Слава: Вседержи́тель Госпо́дь, всели́выйся во утро́бу Твою́, сто́лп утвержде́ния ве́рным Тя́ показа́, к нему́же прибега́юще, напа́стей свобожда́емся, искуше́ний ересе́й, и все́х бе́д избавля́емся, те́мже согла́сно пое́м, и превозно́сим Тя́, Чи́стая, во ве́ки.
И ныне: Страстоте́рпцы Зогра́фския оби́тели, пострада́ти за благоче́стие укрепи́ла еси́, Влады́чице, с ни́ми у́бо моли́ Христа́ Бо́га о спасе́нии ду́ш на́ших, да благослови́м и превозно́сим Тя́ во вся́ ве́ки.