Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.
Святи́и благове́рнии Пе́тре и Февро́ние, моли́те Бо́га о нас.
В боле́зни к тебе́ прибега́ющих избавля́й, преблаже́нне Пе́тре ку́пно с Февро́ниею, Христу́ вопию́щих: оте́ц на́ших Бо́же, благослове́н еси́.
Святи́и благове́рнии Пе́тре и Февро́ние, моли́те Бо́га о нас.
Все́м приста́нище бу́дите, преблаже́ннии, и небу́рное оти́шие су́щим во гресе́х, да и мы́ с ва́ми Христу́ возопие́м: оте́ц на́ших Бо́же, благослове́н еси́.
Святи́и благове́рнии Пе́тре и Февро́ние, моли́те Бо́га о нас.
Прибе́жище да ми́ бу́дите в де́нь гне́ва, богоблаже́ннии, я́ко посреде́ хожду́ сете́й мно́гих: те́мже изба́вите мя́ от ни́х, да возмогу́ воспе́ти ва́с.
Сла́ва Отцу́ и Сы́ну и Свято́му Ду́ху.
Дне́сь пресла́вная па́мять Петра́ и Февро́нии, я́ко со́лнце, возсия́ в ми́ре, в ню́же соше́дшеся, вси́ воспое́м си́це: оте́ц на́ших Бо́же, благослове́н еси́.
И ны́не и прис́но и во ве́ки веко́в. Ами́нь.
Ка́пля богото́чная, от Тебе́ ро́ждшаяся, ми́р освяти́, Богоро́дице Де́во: ка́пли мне́ ми́лости источи́, освяща́ющия ду́ши и помышле́ния земны́х.