Ирмос: Вску́ю мя отри́нул еси́ от лица́ Твоего́, Све́те Незаходи́мый, и покры́ла мя есть чужда́я тьма, окая́ннаго, но обрати́ мя и к све́ту за́поведей Твои́х пути́ моя́ напра́ви, молю́ся.
Пресвята́я Богоро́дице, спаси́ нас.
Сте́ну тве́рду и столп непоколеби́м Тя и́мать Гора́ в наше́ствиих ва́рварских: студа́ бо исполня́еши вра́жия ли́ца и возвраща́тися твори́ши им вспять тще́тным и безде́льным, Влады́чице.
Пресвята́я Богоро́дице, спаси́ нас.
Ма́тернее промышле́ние о су́щих в Горе́ иму́щей Ти, стра́ха ра́ди Сы́на Твоего́, Де́во, поболе́ Ватопе́д, уве́дев о разбо́йницех, и роди́ дух спасе́ния предста́тельством Твои́м, Преблагослове́нная.
Пресвята́я Богоро́дице, спаси́ нас.
Яко же настоя́теля Ватопе́дскаго, по у́трени бде́вша и моли́вшася, наста́вила еси́, Блага́я, ка́ко спасти́ся от напа́сти, та́ко и нам пода́ждь тща́ние от но́щи у́треневати к Бо́гу и ко спасе́нию наста́ви ны, избавля́ющи от всех бед.
Пресвята́я Богоро́дице, спаси́ нас.
Якоже запрети́ла еси́, Госпоже́, отверза́ти врата́ гото́вой су́щей поги́бели от враго́в, та́ко положи́ в нас благода́тную дверь огражде́ния, да не обря́щется вхо́да всезло́бным губи́телем и их пле́велом.
Слава: Яко же повеле́ла еси́, Влады́чице, возше́дше на сте́ны, разгна́ти разбо́йники, та́ко укрепи́ бы́ти нам на четверосте́нии му́жества и пра́вды, му́дрости и целому́дрия, да отража́ем борю́щия ны.
И ныне: Яко же уми́лостивила еси́, Де́во, Сы́на Твоего́, прогне́вавшася на су́щия в Ватопе́де, та́ко умилостивля́й Его́ о нас, во мно́гия грехи́ впада́ющих, мно́го бо мо́жет моле́ние ма́тернее ко благосе́рдию Влады́ки.