Ирмо́с: Госпо́дь, Сы́й, все́х и Зижди́тель Бо́г, созда́нное, Безстра́стный, обнища́в, Себе́ соедини́, и Па́сха, за я́же хотя́ше умре́ти, Са́м Сы́й, Себе́ предпожре́: яди́те, — вопия́, — Те́ло Мое́ и ве́рою утверди́теся.
Ми́лостиве Го́споди, услы́ши моли́тву раб Твои́х, моля́щихся Тебе́.
Иису́су: Госпо́дь, Сы́й, все́м Зижди́тель, ру́це Твои́ вся́ сотвори́ста и созда́ста, и, ра́зве Тебе́, не́сть спаса́ющаго, де́ло руку́ Твое́ю, не пре́зри на́с, Еди́не, во бла́гости неизме́нный и неизсле́димый в щедро́тах.
Преподо́бнии отцы́ Симео́не и Са́вво, моли́те Бо́га о нас.
Вни́з влеку́щия сла́вы, я́ко из се́ти, исто́ргшеся, к Боже́ственней высоте́ смире́нием све́тло, преподо́бнии, возвы́сившеся, свети́льники све́тлы яви́стеся, сердца́ на́ша моли́твами свои́ми ко Христу́ просвеща́йте.
Преподо́бнии отцы́ Симео́не и Са́вво, моли́те Бо́га о нас.
Потемне́вшую мра́ком е́реси пе́рвее, па́че со́лнца ве́рою Тро́ице страну́ Се́рбскую просвети́вшии, и на́с у́бо греха́ нечистоты́ ко Христу́ ны́не моли́твами свои́ми, Симео́не и Са́вво, омы́ти потщи́теся.
Сла́ва: Лю́дие зако́на и благода́ти, без зако́на су́щим уподо́бихомся, му́жие кро́ве и льсти́ви бы́хом и стезю́, я́же на ны́ гне́ва Твоего́, ше́ствовахом, Го́споди, моли́твами святы́х Свои́х не погуби́ на́с по беззако́ниям на́шим.
И ны́не: Истинную Богоро́дицу испове́дую, Влады́чице, Тя́, сме́рти держа́ву потреби́вшую: я́ко бо оживля́ющая, от у́з а́довых к животу́ возвела́ еси́ мя, в зе́млю те́кшаго.
Го́споди, поми́луй (трижды). Сла́ва, и ны́не.
Седа́лен, гла́с 4:
Шестокры́лыми и многоочи́тыми неви́димый и все́ми непостижи́мый, Влады́ко, милосе́рдием ми́лости сподо́бився на́м ви́ден бы́ти пло́тию, ве́дый не́мощь на́шу, я́ко в ню́ обле́кшийся, поми́луй мно́го Ти́ согреши́вших, пою́щих Тебе́ ра́б Твои́х, благопреме́нне Го́споди.