а҃. Бг҃ъ ста̀ въ со́нмѣ богѡ́въ, посредѣ́ же бо́ги разсꙋ́дитъ.
в҃. Доко́лѣ сꙋ́дите непра́вдꙋ, и҆ ли́ца грѣ́шникѡвъ прїе́млете;
г҃. Сꙋди́те си́рꙋ и҆ ѹ҆бо́гꙋ, смире́на и҆ ни́ща ѡ҆правда́йте:
д҃. И҆зми́те ни́ща и҆ ᲂу҆бо́га, и҆з̾ рꙋкѝ грёшничи и҆зба́вите є҆го̀.
є҃. Не позна́ша, нижѐ ѹ҆разꙋмѣ́ша, во тмѣ̀ хо́дѧтъ: да подви́жатсѧ всѧ̑ ѡ҆снова̑нїѧ землѝ.
ѕ҃. А҆́зъ рѣ́хъ: бо́зи є҆стѐ, и҆ сы́нове вы́шнѧгѡ всѝ:
з҃. Вы́ же ꙗ҆́кѡ человѣ́цы ѹ҆мира́ете, и҆ ꙗ҆́кѡ є҆ди́нъ ѿ кнѧзе́й па́даете.
и҃. Воскрⷭ҇нѝ, бж҃е, сꙋдѝ землѝ: ꙗ҆́кѡ ты̀ наслѣ́диши во всѣ́хъ ꙗ҆зы́цѣхъ.