Единородне Сыне и Слове Божий, изволивый нашего ради спасения воплотитися и смерть претерпети, ныне же, и со пречистою плотию Твоею, на небесех на престоле со Отцем седяй и весь мiр в правде управляяй! Не забуди нас, долу сущих и многими напастьми и скорбьмѝ искушаемых, иже аще и весьма нечисти и недостойни есмы, но в Тебе Спасителя и Господа нашего веруем, и иного ходатая и надежды спасения не вемы. Подаждь, о Искупителю Всеблагий, память пречистых и страшных страстей Твоих, како даже до ада пречистою душею Твоею низшел еси, да нас от власти и мучительства адова свободиши. Сия убо вся в сердцах своих слагающе, да блюдемся от страстей и грехов наших, правду же и добродетель, яже всякаго дара Тебе в нас приятнейши есть, да возлюбим. Веси бо, о Всеблагий, коль вели́ка есть немощь духа и плоти нашея, враг же наш силен и злохитр, иже яко лев рыка́я ходит, иский кого поглотити: не остави убо нас Твоею всесильною помощию, и буди с нами всегда, храня и покрывая, наставляя и укрепляя, радуя и веселя дух наш. Мы же, на лоно любве и милосердия Твоего повергающеся, весь живот наш, временный и вечный, Тебе предаем, нашему Владыце, Искупителю и Господу, моляще из глубины души, да, имиже веси судьбами, сотвориши нам прейти безбедно мрачную жития сего земнаго юдоль и достигнути богокраснаго чертога Твоего, егоже обещал еси уготовати всем верующим во имя Твое и последующым божественным стопам Твоим.