Боже сил, Царю царствующих и Господи господствующих! В Твоей руцѐ сердце царе́во и власть всея земли. Ты посаждаеши царей на престолы их и глаголеши о них: мною ца́рие царствуют, не прикасайтеся убо помазанным Моим. Призри милостивным оком Твоим на люте страждущую страну нашу, в нейже за беззакония наша нестроения и раздоры, междоусобия и противления царю нашему и властем, от него поставленным, зело умножишася. Еще же и мор, и глад, и болезни всякия постигоша ны, и несть мира, несть ослабы, несть успокоения в домех наших, ниже во граде́х и ве́сех наших. О Всеведущий и Премилосердый! Ты веси беду нашу, зриши озлобления, слышиши рыдания убогих, стенания сирых и вдовиц и гласы неповинных младенцев, во общену́ждии страждущих. Ты пощадил еси Ниневи́ю, град великий, беззакония исполненный, ради покаяния его и ради младенцев, иже десницы своея, ни шу́йцы своея не познаша: пощади нас грешных, умилосердися над отечеством нашим, пощади ради младенец наших, сирых и вдовиц, пред Тобою, о Милосердый, сле́зы своя проливающих! Видиши, Господи, како людие, имже несть разума, не точию глаголют в сердцах своих: несть Бог, но и в слух людей, паче же юных сущих, развращенная глаголют, и ме́ньшую братию от пути заповедей Твоих на пути стропотныя и погибельныя превратити тщатся. Но Тебе вся возможна суть, о Всемогущий Владыко! Якоже убо единым словом Твоим не точию слепыя, глухия и немыя исцеляеши, но и мертвыя воскрешаеши: тако возглаголи и ныне всесильным словом Твоим в сердцах сих сеятелей нечестия: просвети разум их, гордынею омраченный, пробудѝ совесть их суетными мудрова́ньми, завистью и страстьми пагубными усыпле́нную, обрати волю их ко исполнению животворящих Твоих заповедей, да и тии познают, коль сладка суть словеса Твоя сердцу человеческому, и коль благо иго Твое и бремя Твое легко есть. Да прославится убо имя Твое, Господи Спасителю наш, и в сих погибающих братиях наших, и да посрамится лукавый супостат наш диавол, сеяй плевелы на ниве Твоей, яже есть Церковь Твоя святая! О Господи, Боже Милосердый, Боже Премудрый, Боже Всемогущий! Паки и паки припадаем Тебе и слезно в покаянии и умилении сердца вопием: согреши́хом, беззако́новахом, непра́вдовахом пред Тобою, и воистинну праведно по делом нашым наказу́еми есмы. Помяни убо веру и смирение отец наших, услыши те́плая моления святых угодников Твоих, в земли нашей просиявших: помилуй землю русскую, утоли вся крамолы̀, раздоры и нестроения, умирѝ сердца, страстьмѝ обуреваемая, сохрани возлюбленнаго Тобою раба Твоего, царя нашего, огради престол его правдою и миром, возглаголи в сердце его благая и мирная о Церкви Твоей и о людей Твоих, посли ему советники мудростию исполненныя и волю его нелицеприятно творящия, соблюди суды его немздоимны, вдохни мужество в сердца нашея державы хранителей: а имже судил за веру, царя и отечество во дни скорби сея душу свою положити, тем прости вся согрешения их и венцы мученическими венчай во Царствии Твоем. Всех же нас озари светом закона Твоего Евангельскаго, возгрей сердца наша теплотою благодати Твоея, утверди волю нашу в воли Твоей, да якоже древле, тако и ныне на земли нашей, и в нас прославится всесвятое имя Твое, Отца и Сына и Святаго Духа, ныне и присно и во веки веков.