Святый Ангеле Божий, хранителю мой, моли Бога о мне.
Ангеле Христов святый, к тебе, припадая, молюся, хранителю мой святый, приданный мне на соблюдение души и телу моему грешному от святаго крещения! Аз же своею леностию и своим злым обычаем прогневах твою пречистую светлость и отгнах тя от себе всеми студными делы: лжами, клеветами, завистию, осуждением, презорством, непокорством, братоненавидением и злопомнением, сребролюбием, прелюбодеянием, яростию, скупостию, объядением без сытости и опивством, многоглаголанием, злыми помыслы и лукавыми, гордым обычаем и блудным возбешением, имый самохотение на всякое плотское вожделение. О, злое мое произволение, егоже и скоти безсловеснии не творят! Да како возможеши воззрети на мя или приступити ко мне, аки ко псу смердящему? Которыма очима, Ангеле Христов, воззриши на мя, оплетшася зле во гнусных делех? Да како уже возмогу отпущения просити горьким и злым моим, и лукавым деяниям, в няже впадаю по вся дни и нощи и на всяк час? Но молюся ти, припадая, хранителю мой святый, умилосердися на мя, грешнаго и недостойнаго раба твоего (имя рек), буди ми помощник и заступник на злаго моего сопротивника святыми твоими молитвами и Царствия Божия причастника мя сотвори со всеми святыми, всегда и ныне, и присно, и во веки веков. Аминь.
В пяток же вечера чтется акафист Пресвятей Богородице.
Таже: Достойно есть… (Поклон земный.) Аще же попразднство, поем задостойник праздника. Слава и ныне: Господи, помилуй. (Трижды.) И отпуст: Молитвами святых отец наших, Господи Иисусе Христе, Боже наш, помилуй нас. Аминь. Господи, помилуй. (Трижды.)
Утверждение на Тя надеющихся, утверди, Господи, Церковь, юже стяжал еси честною Твоею кровию.
Владычице, приими молитвы раб Твоих и избави нас от всякия нужды и печали. Аще есть праздник, поем тропарь, кондак и величание.
Приидите, поклонимся…