В великий и празднственный день сей, день твоего на земли прославления, святителю отче наш Иоасафе, земли нашея славо и радование великое, приими сия смиренная и теплая моления наша. Днесь зрим исполнившийся глагол Господень: прославляющыя Мя прославлю. Се бо во дни земнаго жития твоего ничесоже искал еси, точию еже волю Божию исполня́ти и чада паствы Твоея управити во спасение, и того ради многия труды, скорби, болезни и путешествия подъял еси. По скончании же твоем прослави тя милосердый Господь, телеси твоему нетление и силы целебныя даровавый: темже токи исцелений молящымся источил еси, и призывающым тя недунующым и скорбящым мно́гажды являлся еси, утешение и цельбу̀ скорую тем подавая. Сего ради, якоже избранника Божественныя благодати тя ведущи, Церковь Христова днесь прославити тя якоже новаго чудотворца земли нашея сподо́бися. Благослови убо и помилуй, архиерею Истиннаго Бога, благочестивейшаго Государя нашего, императора Николая Александровича: супругу его, благочестивейшую государыню императрицу Александру Феодоровну: матерь его, благочестивейшую государыню императрицу Марию Феодоровну: наследника его, благовернаго государя цесаревича и великаго князя Алексия Николаевича, и весь царствующий дом. Даруй нам утешение сердца, отраду и мир и радость присную о Господе. Во дни жития их сохрани в мире державу Российскую, слуги царевы во истине утверди, воином мужество непоколебимое даруй, и вся люди безпечальны сохрани. Изжени всякую крамолу̀, и крамольных человек лукавая разрушѝ советования, паче же тех самых в покаяние приведи. Пастырем и архиереем подаждь премудрость, чистоту и праведное житие, якоже и сам сими украшался еси. Младенцем воспитание благое даждь, юныя научи, болящым и скорбящым здравие испроси. Сущым во трудех терпение и упование посли, богатым смиренномудрие и ко ближним милосердие даруй. Намже всем радость о Господе присную подаждь, да вси благодарне тя ублажаем, глаголюще тако: величаем тя, святителю отче Иоасафе, и чте́м святую память твою, ты бо мо́лиши за нас Христа Бога нашего.