Приими, Всеблагомощная, Пречистая Госпоже, Владычице Богородительнице, сия честныя дары от нас недостойных раб Твоих, ко Твоему цельбоносному образу пение возсылающих со умилением, яко Тебе Самой зде сущей и послу́шающей моления наша и подаю́щей с верою просящым исполнение по коемуждо прошению. Скорбящым бо скорби облегчаеши, немощным здравие даруеши, разслабленныя и недужныя исцеляеши и от бесных бесы прогоняеши, обидимыя от обид избавляеши, грешныя прощаеши, прокаженныя очищаеши, малыя дети милуеши, и неплодныя от неплодства разрешаеши. Еще же, Госпоже Владычице, и от уз и темниц свобождаеши, и всякия многоразличныя страсти исцеляеши, и очныя болезни врачуеши, и от смертоносныя язвы избавляеши: вся бо возможна суть ходатайством Твоим к Сыну Твоему, Христу Богу нашему. О Всепетая Мати, Пречистая Богородице! Не престай молитися о нас недостойных рабех Твоих, славящих Тя и почитающих, и покланяющихся пречистому образу Твоему, и надежду имущих невозвратну и веру несумненну к Тебе, Приснодеве Преславней и Пренепорочней, ныне и присно и во веки веков.