О преславный Госпо́день угодниче и Богом собра́ннаго здѐ о тебе ста́да Христова предобрый па́стырю и наставниче, преподобне и богоносне отче наш Ефре́ме! Приимѝ убогое сие наше и малое, от любве душе́вныя приноси́мое тебе моление, и не пре́зри нас грешных, требующих твоея̀ помощи и заступления. Се бо мы, предстателя тя в ну́ждах непостыднаго стяжа́вше, верою несумне́нною тебе в хода́тайство призыва́ем: ты же, яко ве́лие име́яй дерзнове́ние ко Господу и Пречистей Его Матери, бу́ди молитвенник, и помощник и хода́тай о всех, со тща́нием в Божественный твой храм приходящих, честны́х же и многоцеле́бных моще́й твоих со страхом и благоговением прикаса́ющихся. Услы́ши ны, свя́тче Божий, и при́зри милостивым оком на предстоящыя цельбоно́сному твоему гробу люди. Ве́мы бо вои́стину, яко аще по отше́ствии твоем пло́тию от нас разлучи́лся еси, но духом неотступно с нами пребыва́еши: темже и вся нам, яже ко спасению поле́зная, усе́рдне просящым, моли́твами твоими пода́ти мо́жеши. Прострѝ убо преподобныя дла́ни твоя, о добрый и великий наш заступниче, и не преста́й моли́тися о державе благочестивейшаго и великаго госуда́ря нашего, императора Николая Александровича, самоде́ржца Всероссийскаго, и о всем царствующем доме, о Святейшем Правительствующем Синоде, и о преосвященном епископе нашем имярек, и о всех на всяком месте благоче́стно тебе на помощь призыва́ющих. Сохрани же царствующыя гра́ды, и град сей, и святую оби́тель сию̀, и вся гра́ды и страны̀ Российския от нашествия иноплеменных, междоусо́бныя брани, тлетво́рных ветр и от всякаго губительнаго зла. Кти́торы святыя оби́тели сия̀, и вся пребыва́ющыя и тружда́ющыяся в ней и благочестно притекающыя к честны́м моще́м твоим посетѝ, соблюдѝ и изба́ви от всяких бед и скорбе́й, яко да тобою управля́еми, многомяте́жное маловре́менное жития̀ сего мо́ре безбе́дне преплы́вше, достигнем в желаемое оное Небесное Пристанище, и прославим Всесвятую, Равночестную и Единосущную Троицу, Отца и Сына и Святаго Духа, ныне и присно и во веки веков.