О святителю Христов Иоанне милостиве, великий молитвенниче, сирых покровителю, в ну́ждах сущим помощниче, немощных целебниче и сущих в напастех защитниче! К тебе, яко скорому помощнику и великому хода́таю, с верою и любовию притекаем, и пред святыми твоими цельбоносными моща́ми и святою иконою тебе смиренно молимся. Ты на земли Христовы любвѐ и благости ко страждущым исполнен пребывал еси, и яко чудная сокровищница милосердия, имя милостивый себе стяжа́л еси. ты, преизоби́луя щедро́тами милостей твоих, яко непрестанно текущая многово́дная река явился еси, всех жаждущих обильно напая́ющая. Ты, преиспо́лнен сый любвѐ и благости, яко преизоби́льная житница чистыя питательныя пшеницы был еси, всех а́лчущих обильно насыщающая. Ты, богатство твое нищым и убогим расточив, неистощимое сокровище зла́та и сребра̀ показался еси, всех сущих в нищите снабдева́я и обидимых от немилосе́рдых заимода́вцев заступая: и тако ни еди́н от требующих твоих милостей и щедрот лише́н бысть твоея благостыни и снабде́ния. Ты был еси скорое вразумление, сердечное утешение и всемо́щное заступление всем человеком во всякой скорби и обиде, от злых людей по навету диаволю бываемым, и во всяком злоключении и испытании, по Божию попущению насылаемым, яко ни един же от притекавших к тебе лишен бысть твоего утешения и заступления. Ты, непрестанно в молитвах пребывая, стяжал еси богатство цельбоносныя молитвы, е́юже не то́чию сам ты всем милость творил еси, но и сердца̀ злых человек ко утешению скорбящих и озло́бленных, ко призре́нию немощны́х и убогих согрева́л еси. Темже веруем, благи́й святителю Христов, яко по преселе́нии твоем в небесныя обители великую мзду твоих молитв, подвигов и благотворения приял еси, па́че же усугу́бися в тебе благодатный дар милосердия, и оттолѐ сосуд неисчерпа́емь всякия благостыни соде́лался еси. Сотвори убо, угодниче Божий и милостивый помощниче, твоим хода́тайством и заступлением пред Господем Богом, да вси в молитвах прибега́ющии к тебе и пред святыми твоими моща́ми и благодатною твоею иконою покланя́ющиися мирное и безмятежное житие обря́щут, здравие же и спасение, любовь и единомыслие, во временных скорбех и печалех утешение, в житейских ну́ждах и лише́ниих помощь: всели в нас надежду вечных благ и во Царствии Небеснем упокоения, яко да вси, по твоему всемо́щному хода́тайству всякия да́ры милосердия прие́млюще, и сами любо́вию друг ко другу испо́лнятся, и да всели́тся в нас и во гра́де сем, во святей обители сей и во всех призывающих имя твое мир и радость о Ду́се Свя́те, Емуже подобает всякая слава, честь и поклоне́ние, со Безначальным Отцем и Единородным Его Сыном, всегда, ныне и присно и во веки веков.