Премудрая и всекра́сная святая великому́ченице Христо́ва Варва́ро! Блаженна еси, яко премирная мудрости Божия плоть и кровь не яви тебе, но Сам Бог Отец Небесный, иже тебе, веры ради от невернаго отца оставленную, и́згнанную и умерщвле́нную, в дщерь Себе возлюбленную прия́т: за тленное земна́го имения насле́дие, пло́ти нетление дарова̀: труды мученическия упокоением во Царствии Небеснем увенча̀: вре́менное твое житиѐ, смертию Его ради пресече́нное, сицево́ю возпросла́ви по́честию, яко душу с лики небесных вчинѝ духо́в, тело же, на земли во храме их Ангельском положе́нное, Ангелом запове́да сохрани́ти це́ло, че́стно и многочуде́сно. Блаженна еси, Христу̀ Сыну Божию, Жениху Небесному, уневе́щенная дево, Егоже добро́ты твоея Рачи́теля имет́и жела́ющи, всю себе страданием, ранами, удо́в ре́занием и са́мыя главы̀ отсечением, а́ки у́тварьми дража́йшими потща́лася еси украси́ти: да тако, яко жена ве́рна, главе своей, Мужу Христу, духом и телом соединишися неразлучно, глаголющи: обрето́х, Егоже возлюбѝ душа̀ моя, удержа́х Его, и не оста́вих Его. Блаженна еси, яко Святый Дух на тебе почи́л есть, имже духовными духо́вная разсуждати науче́на бы́вши, вся ду́хи лука́вствия во и́долех яко па́губныя отри́нула еси, и Единаго Бога Духа позна́вши, яко истинная покло́нница, ду́хом и и́стиною кла́нятися изво́лила еси, проповеднически глаголющи: Троицу чту̀, Еди́но Божество. Сию убо Святую Троицу, юже в житии и смерти испове́данием и страда́нием твоим прославила еси, умолѝ о мне, предста́тельнице моя, яко да и аз всегда тро́йственною, веры, любвѐ и надежды, Ту́южде Святую Троицу почитаю доброде́телию. И́мам светильник веры, но пра́зден благих дел еле́а: ты, мудрая дево, страда́льческую плоть твою, крове испо́лнену и ранами прелива́ющуся, а́ки светильник иму́щая, даждь от еле́а твоего, да тем душе́вную мою свещу̀ украси́в, сподоблюся по тебе внити в чертог небесный. Пресе́льник аз есмь на землѝ и пришле́ц, якоже вси отцы мои: ты убо, благ вечных насле́днице и блаже́нная обе́да во Царствии Небеснем прича́стнице, яко в стра́нстивии жития̀, трапезы Божественныя угоще́ния, сице и во исходе от мiра, жела́емаго сподо́би мя напу́тствования: и егда̀ в конец сном смерти начну усыпа́ти, сотвори, яко да благодатию Божественных Тела и Крове Таин укрепле́н, прейду̀ в крепости я́ди тоя̀ дале́кий путь смерти, даже до горы небесныя: и тамо, Егоже ты чрез три окна ба́нныя прежде верою Бога Троицу узре́ла еси, Сего ку́пно с тобою лицем к лицу да удосто́юся ви́дети и сла́вити Его в нескончаемыя веки.