О богоблаженне и преподобне отче наш Мартиниа́не! Молимся тебе и от сердца с любовию вопием, да непотребных нас вразуми́ши, и просвети́ши, и твоими молитвами укрепи́ши некая похвальная словеса̀ принести в память твоего преставления: обаче сие не в мудрости словес дерзаем глаголати, но со многою верою и любовию к чадолюбивому отцу сия приносим. Ты убо, о преподобне отче наш Мартиниа́не, наших согрешений прощение испроси, да в дому̀ Пречистыя Владычицы нашея Богородицы, непреоборямыя верным ограды пребывающе, тобою благим предстателем нашим свобо́дни пред Богом яви́мся, и необладаеми от всех враг видимых и невидимых пребудем. О пастырю наш по Бо́зе добрый, истинный строите́лю винограда Христова, отцем славо и преподобным единонра́вие, и праведным совсе́льниче, и общаго жития соверши́телю изрядный! Ныне на небеси Святей Троице предстоя со всеми святыми, молися о нас: о сем бо, ко гробу твоему припадающе, яко чадолюбиваго отца усердно тя молим. Помяни твое стадо, еже сбрал еси мудре, и соблюди твоими молитвами Богом дарованную паству: не презри нас, чтущих пречестную и многорадостную твою память: очисти наша согрешения: отжени от нас о́блак страстей: просвети наши душевныя очи, и гугни́вый язык исправи, смысл очисти и разум освяти. Прииди посреде нас невидимо, и от всех нас моления Богови возсылаемая приими, и донеси сия хода́тайственне всех Творцу и Избавителю, в Троице Святей покланяемому Истинному Богу нашему, яко да согреше́нием нашым оставление получим, благодатию и человеколюбием Господа нашего Иисуса Христа: с Нимже Отцу слава со Святым Духом, ныне и присно и во веки веков.