Непостижимая и Всепетая Премудросте Божия, сиречь Единородный Сыне и Слове Божий! Приими молебное сие пение от недостойных и скверных уст наших, аще и несть красна̀ песнь во устех грешничих. Обаче, якоже разбойник единым словом спасеся, и мытарь воздыханием оправдася, и дщи ханане́нна матерним прошением исцелися: тако и ныне милостив к мольбам нашым явися. Понеже ты, Господи, Благ и Человеколюбив сый, грядущаго в мiр просвещаеши, и грехи грешником отпущаеши, и разумом неразумныя наполняеши, и буяго умудряеши, и жаждущыя душы благих словес учением Твоим, якоже самаряны́ню водою жизни напая́еши, блудникѝ целому́дрены устроя́еши, разбойнику рай отверзаеши. Ты бо воистину еси всех благих Податель и Вразумитель, и жизни Хранитель, Христе Боже наш, и Тебе славу и хвалу, честь и благодарение и славословие возсылаем, и поклонение творим, со Безначальным Твоим Отцем, и со Пресвятым и Благим и Животворящым Духом, и со Пресвятою и Пренепорочною Твоею Ма́терию, Владычицею нашею Богородицею и Приснодевою Мариею, со всеми святыми Твоими, ныне и присно и во веки веков.