О свяще́нная главо̀, земный ангеле, небесный человече, великий чудотворче, преподобне отче Корни́лие! К тебе днесь с верою и любовию усердно прибегающе, умиле́нно тя небеснаго предстателя нашего просим: явѝ нам смиренным и грешным любовь твою отеческую и многомо́щное твое заступление: се бо, грех ради наших, не дерза́ем со свободою чад Божиих проси́ти Господа и Владыку нашего о нужных нам на потребу, но тебе молитвенника к Нему благоприятнаго предлагаем, верующе несомненно, яко вся благая мо́жеши нам испроси́ти у благости Его. Испроси убо нам, угодниче Божий, у Всещедраго и Человеколюбца Бога веру правую, благочестие непоколебимое, покаяние совершенное, жития исправление, да прочее не прогневляем Господа нарушением святых Его заповедей, но сподо́бимся прощение грехов наших от Него получи́ти. Умоли, чудотворче святый, Царя царствующих и Господа господствующих дарова́ти мир и благострое́ние царству нашему всероссийскому, здравие же, спасение и на враги одоление благочести́вейшему, самодержа́внейшему, вели́кому госуда́рю нашему, императору Николаю Александровичу, яко да позна́ют вси противля́ющиися ему, яко с нами Бог и святии угодницы Его. Сохрани, святче Божий, молитвами твоими Церковь Христову от ересе́й и расколов, суеверия и неверия человеческаго, да цветет в ней святое православие и благочестие. Соблюдѝ от всякаго зла и обитель твою созда́нную, и вся живущыя и подвизающыяся в ней по твоим уставом, да цели и невредими пребудут от искушений врага спасения человеческаго. При́зри милостивно и на предстоящыя ра́це моще́й твоих и молящыяся люди, и вся прошения их во благо исполни: болящым исцеление, скорбящым утешение, бедствующым вспоможение скоро подаждь. Нам же всем здравие душевное и телесное, земли плодоносие, тихое и богоугодное житие, благую христианскую кончину и добрый ответ на Страшнем Суде Христове у Всемилостиваго Бога исхода́тайствуй, яко воистину име́яй ве́лие к тому дерзновение. Ей, отче! вемы, яко много может молитва твоя пред лицем Вседержителя Господа: сего ради крепко на тя уповаем, и на твоя святыя молитвы зело̀ надеемся, яко ты преведе́ши нас предстательством твоим в небурное пристанище спасения и наследники пока́жеши нас всесветлаго Царствия Христова. Не посрами убо, преподобне отче наш, упования нашего, но сподоби нас вкупе с тобою блаженства райскаго наслажда́тися, да славим, хвалим и величаем великую милость к нам Человеколюбца Бога, Отца и Сына и Святаго Духа, и твое благое отеческое заступление, во веки веков.