Святая невесто Христова, многострадальная мученице Параскево! Вемы яко от юности твоея ты всею душею твоею и всем сердцем твоим возлюбила еси Царя славы, Христа Спасителя, и Ему Единому уневе́стилася еси, неимущым вся имения твоя расточивши. Ты силою благочестия, целомудрием же и праведностию яко лучами солнечными просияла еси, посреде неверных свято поживши и безбоязненно тем Христа Бога проповедавши. Ты от дней юности твоея, от родителей научена бывши, дни искупительных страстей Господа нашего Иисуса Христа благоговейно чествовала еси, Егоже ради и сама волею пострадала еси. Ты, десницею Ангела Божия от неисцельных ран дивно исцеле́на бывши и восприе́мши неизреченную светлость, неверныя мучители удивила еси. Ты, именем Господа нашего Иисуса Христа и силою молитвы твоея в капище языческом вся идолы до́лу пове́ргши, во прах сокрушила еси. Ты, свеща́ми опаля́ема су́щи, единою молитвою твоею ко Всесильному Господу угасила еси огнь естественный, и темже пламенем, чудесне возжженным чрез Ангела Божия, неистовыя беззаконники попалила еси, и мног народ людей к познанию Истиннаго Бога привела еси. Ты, во славу Господа ме́чное усече́ние во главу̀ прии́мши, доблественно скончала еси страдальческий твой подвиг, и душе́ю твоею на небеса в чертог вожделеннаго твоего Жениха Христа, Царя славы, востекла̀ еси, иже тако о тебе возгласи́ти благоволѝ: радуйтеся, праведнии, яко мученица Параскева увенча́ся! Темже и мы, днесь во храм сей [твой] сошедшеся, поклонение ти радостно приносим, и взирающе на святую твою икону, со умилением вопием ти: о всечестна́я Параске́во! Вемы, яко ве́лие и́маши дерзновение ко Господу: умоли убо Его человеколюбца и о нас грешных, да терпение и благодушие в бедах и скорбных обстоя́ниих нам дарует, да подаст же благоденственное и мирное житие, здравие и спасение и во всем благое поспешение благочестивейшему, сомодержавнейшему, великому государю нашему, императору Николаю Александровичу, и всему царствующему дому: Отечеству же нашему да низпо́слет святое свое благословение и мир, и всем православным христианом да подаст твоиси святыми молитвами в вере и благочестии утверждение и в христианстей любви преспеяние: да очистит нас грешных от всякия скверны и порока: да оградит нас святыми своими Ангелы, да заступит, сохранит и помилует всех Своею благодатию, и наследники и причастники Небеснаго Своего Царствия вся ны да соделает, яко да твоими святыми молитвами, всеславная невесто Христова Параскево, спасение улучивше, прославим вси пресвятое и великолепое имя дивнаго во святых Своих Истиннаго Бога, Отца и Сына и Святаго Духа, всегда, ныне и присно и во веки веков.