О Пресвятая Дево Богородице, Премилостивая Владычице, вышшая Ангел и Архангел, Царице небесе и земли, страны нашея православныя твердое ограждение, благочестивейшаго государя нашего и всего царствующаго дома покрове и защищение, всякаго дома и семейства христианскаго благоустроительнице, труждающихся во благочестии благословении, нуждающихся неистощимое богатство, сирых и вдовиц кормительнице, девствующих чистото и славо, матерей тихое веселие, отроков мудросте и научение, наставников и детоводителей совершенный разуме! Веруем в державный Твой покров над православным отечеством нашим и над благочестивейшим государем, емуже повелела еси царствовати, и над малейшим из нас, искупленным Божественною кровию Сына Твоего. Веруем, яко в сей иконе Твоей, в благословение от святыя горы Афонския нам данней, Сама Ты низпосылаеши Твое матернее благословение всем нашым и коемуждо дому на Тя упование имущему. Темже со благоговейным трепетом и с благодарным сердцем преклоняемся пред сим новым знамением великия любве Твоея, Владычице, к нам недостойным. Воспоминающе же Твое чудное явление преподобному Афанасию Афонскому, некогда в нужде и скорби бывшему и, яко пребудеши при́сная Домостроительница его обители, от Тебе милостивное обещание приимшему, смиренно молимся Тебе: о премилосердая Мати рода христианскаго! Буди и нам грешным и недостойным рабом Твоим мудрая Домостроительница, житие наше добре устрояющая. Благочестивейшаго государя нашего, императора Николая Александровича, исполни долготою дней и крепостию сил, благопоспеши ему во устроении мира и правды в державе его. Всякое же сообщество, всякий дом и семейство во благочестии и православии, единомыслии, послушании и довольстве соблюди: заблуждшыя на путь правый настави, старость поддержи, младенцы воспитай, всех вразуми приискренне повиноватися уставленным от Бога властем и вся повеленная соблюдати. Облегчи и возстави изнемогающыя, сохрани люди Твоя от всякия нужды, болезни, глада, губительства, града, огня, от всякаго злаго обстояния и всякаго нестроения. Дому сему и всякой души христианстей и всей стране нашей исходатайствуй мир и велию милость ныне и присно и во веки веков.