Велича́ѧ велича́ю тѧ̀ гдⷭ҇и, ꙗ҆́кѡ призрѣ́лъ є҆сѝ на смире́нїе моѐ, и҆ нѣ́си менѐ затвори́лъ въ рꙋка́хъ вра́жїихъ: но спа́слъ є҆сѝ ѿ нꙋ́ждъ дꙋ́шꙋ мою̀. и҆ ны́нѣ влⷣко, да покры́етъ мѧ̀ рꙋка̀ твоѧ̀, и҆ да прїи́детъ на мѧ̀ ми́лость твоѧ̀, ꙗ҆́кѡ смѧте́сѧ дꙋша̀ моѧ̀, и҆ болѣ́зненна є҆́сть во и҆схожде́нїи свое́мъ, ѿ ѻ҆каѧ́ннагѡ моегѡ̀ и҆ скве́рнагѡ тѣлесѐ сегѡ̀: да не когда̀ лꙋка́вый сопоста́та совѣ́тъ срѧ́щетъ и҆ препне́тъ ю҆̀ во тьмѣ̀, за невѣ́дѡмыѧ и҆ вѣ́дѡмыѧ въ житїѝ се́мъ бы́вшыѧ мѝ грѣхѝ, млⷭ҇тивъ бꙋ́ди мѝ влⷣко, и҆ да не ѹ҆́зритъ дꙋша̀ моѧ̀ мра́чнагѡ взо́ра лꙋка́выхъ де́монѡвъ: но да прїи́мꙋтъ ю҆̀ а҆́гг҃ли твоѝ свѣ́тлїи и҆ пресвѣ́тлїи. да́ждь сла́вꙋ и҆́мени твоемꙋ̀ ст҃о́мꙋ, и҆ твое́ю си́лою возведи́ мѧ на бж҃е́ственное твоѐ сꙋди́ще. внегда̀ сꙋди́тисѧ мѝ, да не прїи́метъ мѧ̀ рꙋка̀ кнѧ́зѧ мі́ра сегѡ̀, є҆́же и҆сто́ргнꙋти мѧ̀ грѣ́шника во глꙋбинꙋ̀ а҆́довꙋ, но предста́ни мѝ, и҆ бꙋ́ди мѝ сп҃съ и҆ застꙋ́пникъ: тѣлє́снаѧ бо и҆ сїѧ̑ мꙋчє́нїѧ весе́лїѧ сꙋ́ть рабѡ́мъ твои̑мъ. поми́лꙋй гдⷭ҇и, ѡ҆скверни́вшꙋюсѧ страстьмѝ житїѧ̀ сегѡ̀, дꙋ́шꙋ мою̀, и҆ чи́стꙋ ю҆̀ покаѧ́нїемъ и҆ и҆сповѣ́данїемъ прїимѝ, ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь.