Я́ко трисве́тлаго со́лнца светоза́рныя зве́зды,/ Тро́ическим све́том озаря́ете сердца́ ве́рных,/ сосу́ды Све́та Пресвяты́я Тро́ицы я́вльшеся,/ и преди́вным ва́шим житие́м и́ноком бы́сте тве́рдии законоположи́телие/ и це́рквам благоле́пие, и благове́рным, и святи́телем, и всем лю́дем,/ вся бо де́монския скве́рны отгна́вше отсю́ду/ ва́шими чи́стыми уче́нии и де́лы,/ до́бре упасо́сте ста́до, со́бранное ва́ми,/ но и ны́не мо́лим вас:/ посеща́йте чад свои́х, я́ко иму́щие дерзнове́ние ко Святе́й Тро́ице,/ Богому́дре, Се́ргие с чу́дным ученико́м свои́м Ни́коном,// и моли́те Христа́ Бо́га да спасе́т ду́ши на́ша.
* * *