О пречестна́я и благодати Святаго Духа испо́лненая главо̀, сосу́де избранный Святыя Троицы, преподобне отче наш Кири́лле! Услыши нас грешных, предстоящих ныне пред честною ра́кою твоею и уми́льно молящихся тебе. Помолися о нас Всемилостивому Владыце Иисусу Христу, Богу нашему, и рождшей Его Матери, Владычице нашей Богородице и Присноде́ве Мари́и, о е́же отпусти́ти нам согрешения наша, яже соде́яхом. Ве́мы бо, отче наш, яко, а́ще плотию и в пе́рсти почива́еши, но духом здѐ с нами неотступно невидимо пребыва́еши, назира́я святую обитель твою сию̀, и по твоему нело́жному обещанию сию̀ назида́я, от всяких обстояний сохраняеши ю̀. И я́коже многое дерзновение ко Господу постническими твоими по́двиги стяжа́вый, умолѝ Его святыми твоими молитвами, подати мíрови мир, Церкви Его святей единомыслие, благочестивейшему же государю нашему, императору Николаю Александровичу, на врагѝ победу, служа́щым же зде друг ко другу любовь и согласие: и всем лю́дем с верою к тебе притекающым, вся к пользе душевней и телесней потребная у Господа испросѝ, во еже изба́витися нам всем в день судный от страшныя шуия части, ста́ти же одесну́ю со избра́нными Его в наследие Царствия Небеснаго. Яко Тому подобает всякая слава, честь и поклонение, со Безначальным Его Отцем, и со Пресвятым и Благим и Животворящым Его Духом, ныне и присно и во веки веков.