О Пресвятая Владычице Богородице, небеси и земли Царице! Призри на ны грешныя и недостойныя рабы Твоя, и умоли Сына Твоего, Христа Бога нашего, да оградит ны свыше силою Своею, еже навсегда сохраненным быти нам от всех искушений вражиих и прелестей бесовских. Ты, о Всемилостивая Госпоже Дево Богородице, якоже древле всю Российскую страну удивила еси преславным по воздуху пречестныя Твоея со Предвечным Младенцем иконы хождением и святым тоя града Тихфина посещением, место же сие, пустынно сущее, истинным самошествием и пречудным Твоим со святителем Николаем явлением возвеличила еси: тако и ныне, о Всеблагая Мати Бога Вышняго, покрый ны всеблагим Твоим покровом, сподобивши ны невидимыя благодати Твоея. И такоже древле в богоизбраннем пустыни сея месте богоугоднаго и благоговейнаго мужа Божественный зрак неизреченнаго сияния Твоего видети удостоила еси и милостивно к тому возглаголала еси: тако и ныне благосердыма очима Твоима, о Всепетая Богомати, со обычною Ти любовию на ны и на вся усердно молящыяся Тебе и умильно просящыя Твоея всесильныя помощи и заступления воззревши, буди Всеблагая спасения душ и телес наших Ходатаица пред престолом Сына Твоего и Бога нашего. Спасай убо, о Пресвятая Дево Богородительнице, благовернаго императора нашего, обитель сию и весь род христианский и вся с верою приходящыя и покланяющыяся пречистей иконе явления Твоего, Пресвятую же Троицу, Отца и Сына и Святаго Духа славящыя, и Твое милостивное со святым Николаем предстательство почитающыя, ныне и присно и во веки веков.