Молитва Николаю Чудотворцу Мирликийскому
О, Всеблагий Отче Николае, пастырю и учителю всех, верой притекающих к твоему заступлению, и теплой молитвой тебе призывающих. Скоро потщися, и избави Христово стадо от волков, губящих ея и всяку страну христианскую, огради и сохрани святыми твоими молитвами, от мирскаго мятежа, труса, нашествия иноплеменников, и междуусобные брани, от глада, потопа, огня, меча и от напрасный смерти. И якоже помиловал еси трех мужей, в темнице седящих, и избавил их царскаго гнева и посечения мечного, тако помилуй и меня, умом, словом, и делом, во тьме грехов суща, и избави мя гнева Божия и вечные казни, яко да твоим ходатайством и помощию, Своим же милосердием и благодатию, Христос Бог, тихое и безгрешное житие даст ми пожити в веце сем, и избавит мя шуйяго стояния, сподобит же деснаго, со всеми святыми. Аминь.
Молитва св. благоверному Вел. Кн. Александру Невскому
О, Святый Благоверный Великий Княже Александре! От благоговейных сердец приносимую ти, аще и недостойную, хвалебную песнь сию, приими от нас, яко усердную жертву сердец, любящих тя и ублажающих святую память твою! Охраняй всех нас молитвами твоими: огради ходатайствы твоими Благочестивейшаго Императора нашего и град твой, и вся люди земли Российския, да тихое и безмолвное житие пожив в нынешнем веце, блаженство вечное наследим, и купно с тобой и всеми святыми выну сподобимся воспевати Богу: Аллилуия!
Молитва святителю и чудотворцу Митрофану
Святителю Отче Митрофане, нетлением честных мощей твоих, и многими благодеяниями, чудесно содеянными и содееваемыми тобой, с верой к тебе притекающим, уверившеся, яко имаши велию благодать у Господа Бога нашего, — всесмиренно припадаем вси, и молимся тебе: моли о нас Христа-Бога нашего, да ниспослет всем, чтущим святую память твою, и усердно к тебе прибегающим, — богатые милости Своя. Да утвердит во Святой Своей Православной Церкви, — живый дух правый веры и благочестия, дух ведения и любви, дух мира и радости — о Духе Святе! Да вси члены её, чисты от мирских искушений и плотских похотей, и злого действия злых духов, — духом и истинной поклоняются Ему и усердно пекутся о соблюдении заповедей Его, во спасение душ своих. Пастырем её, — да даст святую ревность попечения о спасении людей, им вверенных: да неверующих просветят; неведующих — наставят; сомневающихся — вразумят и удостоверят; отпадших от Православной Церкви — обратят в святые недра её; верующих — соблюдут в вере; грешных — подвигнут к покаянию; кающихся — утешат и укрепят в исправлении жизни; раскаявшихся и исправившихся — утвердят в святости жизни; — и тако, всех введут, указанным от Него путем, в уготованное вечное царство святых Его! Благочестивейшему же, Самодержавнейшему, Великому Государю нашему, Императору Александру Николаевичу, — да дарует: мужество, мудрость, одоление на вся враги; благопоспешение в устроении благоденствия царства Его, и всему Августейшему дому Его, — радость и долгоденствие! Избранным от Него для управления и суда царства Его, — да ниспослет: усердие, прозорливость, мудрость и верность! Да управляют и судят к спокойствию и радости всех! Всем же в Державе Его людям, — да дарует: мир, тишину, безмятежие; усердие в исполнении заповедей Его, установлений святые Церкви и закона гражданскаго, и изобилие, в потребном для жизни сея, И да избавит Царствующие грады, град сей и вся иные грады царства Его, и веси: от глада, труса, потопа, огня, меча, нашествия иноплеменных, междуусобные брани, смертоносный язвы и от всякого зла! Ей, Святителю Божий! Да устроиши молитвами твоими вся благая душам и телесам нашим: да и мы прославим в душах и телесах наших Господа и Бога нашего, Иисуса Христа, — Ему же, со Отцем, и Святым Духом, слава и держава во веки веков. Аминь.
Молитва преподобному Сергию, Радонежскому Чудотворцу
О, Небесного гражданине Иерусалима, преподобие Отче Сергие! Воззри на нас милостиво, и, к земли приверженных, — возведи к высоте небесной. Ты — горе, на небеси: мы, на земле — низу, удалены от тебе, не только местом, елико грехами своими и беззакониями; но тебе, яко нам сродному, — прибегаем и взываем; настави нас ходити путем твоим; вразуми и руководствуй! Свойственно тебе есть Отче наш — благоутробие и человеколюбие; на земле живущу, не о своем токмо спасении, бысть тебе попечение, но и о всех, к тебе притекающих. Наставление твоя быша тростию книжника скорописца, на сердце каждого, глаголы жизни начертывающаго. Не телесные токмо врачевал болезни, но паче — душевных врач изящный явился еси; и вся твоя святая жизнь бысть зерцалом всякие добродетели. Аще толик был еси, Святче Божий на земли, — колик ныне еси на небеси? Ты днесь предстоиши престолу света неприступного, и в нем, яко в зерцале, — зриши вся наша нужды и прошения! Ты водворяешися вкупе со Ангелы, о едином грешнике кающимся, — радующимися! И человеколюбие Божие — есть неистощимо, и твое к Нему дерзновение много: не престани о нас вопияти ко Господу! Испроси предстательством своим у Всемилостиваго Бога нашего: мир Церкви Его, под знамением креста воинствующей; согласие в вере и единомудрие; суемудрия же и расколов — истребление; утверждение во благих делах; больным исцеление; печальным утешение; обиженным заступление; бедствующим помощь! Не посрами нас, к тебе с верой притекающих. Аще бо и недостойны есмы толикого Отца и ходатая; но ты, быв подражатель человеколюбия Божия, — сотвори нас достойны, чрез обращение от злых дел к благому житию! Вся Богом просвещенная Россия, твоими чудесы исполненная, и милостями облагодетельствованная, исповедует тя быти своего покровителя и заступника! Яви древния милости твоя, и их же отцем спомоществовал еси, не отрини и нас — чад их, стопами их к тебе шествующих! Веруем, яко духом нам соприсутствуеши! Иде же бо есть Господь, яко же слово Его учит нас, — тамо и слуга Его будет! Ты верный еси раб Господень, — и Богу, везде сущу, — ты в Нем еси, и Он в тебе есть; паче же и телом с нами еси! Се нетленные и живоносные твоя мощи, яко сокровище безценное, вручи нам Бог чудес. Предстоя им, яко тебе живу сущу, припадаем и молимся: приими моление наша и вознеси их на жертвенник благоутробия Божия! Да приимем тобой благодать и благовременну в нуждах наших помощь! Укрепи наше малодушие и утверди нас в вере: да несомненно уповаем получити вся благая от милосердия Владыки молитвами твоими. Паству же твою духовную, тобой собранную, — не престани управлять жезлом духовные мудрости: подвизающимся помоги; расслабленных — восстави, споспеши иго Христово нести в благодушии и терпении, и всех нас управи, в мире и покаянии скончати живот наш и преселиться со упованием в блаженная недра Авраамова, иде же ты радостно, по трудех и подвизех, ныне почиваеши, прославляя со всеми святыми Бога, в Троице славимаго, Отца, и Сына, и Святого Духа. Аминь.
Молитва святому великомученику и целителю Пантелеймону