Ꙗ҆́кѡ блꙋдни́ца припа́даю тѝ, да прїимꙋ̀ ѡ҆ставле́нїе, и҆ вмѣ́стѡ мѵ́ра сле́зы ѿ се́рдца приношꙋ́ ти, хрⷭ҇тѐ бж҃е: да ꙗ҆́кѡ ѻ҆́нꙋю ѹ҆ще́дриши мѧ̀ сп҃се, и҆ пода́си ѡ҆чище́нїе грѣхѡ́въ. ꙗ҆́кѡ ѻ҆́наѧ бо зовꙋ́ ти: и҆зба́ви мѧ̀ ѿ тимѣ́нїѧ дѣ́лъ мои́хъ.
Сла́ва: Почто̀ не помышлѧ́еши дꙋшѐ моѧ̀ сме́рти; почто̀ не ѡ҆браща́ешисѧ про́чее ко и҆справле́нїю, пре́жде трꙋбы̀ глаше́нїѧ на сꙋдѣ̀; тогда̀ нѣ́сть вре́мѧ покаѧ́нїѧ. прїимѝ во ѹ҆мѣ̀ мытарѧ̀ и҆ блꙋдни́цꙋ, зовꙋ́щыѧ: согрѣши́хъ тѝ гдⷭ҇и, поми́лꙋй мѧ̀.
И҆ ны́нѣ: Ꙗ҆́кѡ превосходѧ́щаѧ вои́стиннꙋ рождество́мъ твои́мъ си̑лы нбⷭ҇ныѧ, приснодв҃о бцⷣе, и҆̀же тобо́ю бж҃ество́мъ ѡ҆богати́вшесѧ, непреста́ннѡ тѧ̀ велича́емъ.
҆҆ Гдⷭ҇и поми́лꙋй, м҃. и҆ мл҃тва:
Бл҃годари́мъ тѧ̀ гдⷭ҇и бж҃е на́шъ, сп҃се́нїй на́шихъ, ꙗ҆́кѡ всѧ̑ твори́ши во бл҃годѣѧ̑нїѧ жи́зни на́шеѧ: ꙗ҆́кѡ ѹ҆поко́илъ є҆сѝ на́съ въ преше́дшемъ нощно́мъ вре́мени, и҆ воздви́глъ є҆сѝ на́съ ѿ ло́жей на́шихъ, и҆ поста́вилъ є҆сѝ на́съ въ поклоне́нїе чⷭ҇тна́гѡ
и҆ сла́внагѡ и҆́мене твоегѡ̀. Тѣ́мже мо́лимсѧ тебѣ̀ гдⷭ҇и: да́ждь на́мъ бл҃года́ть и҆ си́лꙋ, да сподо́бимсѧ тебѣ̀ пѣ́ти разꙋ́мнѡ, и҆ моли́тисѧ непреста́ннѡ, и҆ вы́нꙋ къ тебѣ̀ зрѣ́ти сп҃си́телю и҆ бл҃годѣ́телю на́шихъ дꙋ́шъ, стра́хомъ и҆ тре́петомъ своѐ сп҃се́нїе дѣ́йствꙋюще. ѹ҆слы́ши
ѹ҆́бѡ и҆ поми́лꙋй бл҃гоꙋтро́бне на́съ, сокрꙋшѝ под̾ но́ги на́шѧ неви̑димыѧ ра́тники и҆ врагѝ: прїимѝ ꙗ҆̀же по си́лѣ на́шей бл҃годарє́нїѧ: да́ждь на́мъ бл҃года́ть и҆ си́лꙋ, во ѿверзе́нїе ѹ҆́стъ на́шихъ, и҆ наꙋчѝ на́съ ѡ҆правда́нїємъ твои̑мъ, ꙗ҆́кѡ что̀ помо́лимсѧ, ꙗ҆́коже подоба́етъ,
не вѣ́мы, а҆́ще не ты̀ гдⷭ҇и д¦омъ твои́мъ ст҃ы́мъ наста́виши ны̀. а҆́ще же что̀ согрѣши́хомъ да́же до настоѧ́щагѡ часа̀, сло́вомъ, и҆лѝ дѣ́ломъ, и҆лѝ помышле́нїемъ, во́лею, и҆лѝ нево́лею, ѡ҆сла́би, ѡ҆ста́ви, простѝ. А҆́ще бо беззакѡ́нїѧ на́зриши гдⷭ҇и, гдⷭ҇и, кто̀ постои́тъ;
ꙗ҆́кѡ ѹ҆ тебѐ ѡ҆чище́нїе є҆́сть, ѹ҆ тебѐ и҆збавле́нїе. Ты̀ є҆сѝ є҆ди́нъ ст҃ъ, помо́щникъ крѣ́пкїй, и҆ защи́титель жи́зни на́шеѧ, и҆ тѧ̀ бл҃гослови́мъ во всѧ̑ вѣ́ки, а҆ми́нь.